India Vs England: ભારત અને ઈંગ્લેન્ડ વચ્ચે ત્રણ મેચની વન ડે શ્રેણી 12 જુલાઈથી શરુ થવા જઈ રહી છે. ટી-20 સિરીઝની જેમ વન ડેમાં પણ રોહિત શર્મા ટીમની કમાનમાં જોવા મળશે. જોકે વન ડે શ્રેણી દરમિયાન ભારતનું બોલિંગ આક્રમણ સંપૂર્ણપણે બદલાયેલું લાગી શકે છે. ભારતીય સમય પ્રમાણે પ્રથમ વન ડે લંડનના ધ ઓવલ ક્રિકેટ સ્ટેડિયમમાં સાંજે 5.30 કલાકથી શરૂ થશે. ઈંગ્લેન્ડની કોશિશ ટી20 સીરિઝમાં મળેલી હારની ભરપાઈ કરવા પર રહેશે. ઈંગ્લેન્ડ સામે પ્રથમ વન ડે રમવા ઉતરતાં જ શિખર ધવન એક ખાસ ઉપલબ્ધિ હાંસલ કરી લેશે.
શિખર ધવન બનાવશે આ રેકોર્ડ
શિખર ધવને ODI ક્રિકેટમાં અત્યાર સુધી 149 મેચ રમી છે. 12 જુલાઈએ રમાનારી મેચ શિખર ધવનની કારકિર્દીની 150મી ODI હશે. ODI ક્રિકેટમાં શિખર ધવનનો રેકોર્ડ ઘણો સારો રહ્યો છે અને તેણે આ સમયગાળા દરમિયાન ઘણા મોટા માઈલસ્ટોન હાંસલ કર્યા છે. તે 150 વન ડે રમનારો ભારતનો 21મો ખેલાડી બની જશે.
શિખર ધવને 149 વનડેમાં 45.54ની શાનદાર એવરેજથી 6284 રન બનાવ્યા છે. આ દરમિયાન શિખર ધવનનો સ્ટ્રાઈક રેટ 93.37 રહ્યો છે. આટલું જ નહીં શિખર ધવને વનડે ક્રિકેટમાં 17 સદી અને 35 અડધી સદી પણ ફટકારી છે.
શિખર ધવન મોટી ટૂર્નામેન્ટનો છે પ્લેયર
શિખર ધવન વર્લ્ડ કપ કે ICC ચેમ્પિયનશિપ ટ્રોફી જેવી મોટી ટુર્નામેન્ટમાં અલગ સ્તરે બેટિંગ કરે છે. શિખર ધવન 2013 અને 2017 ચેમ્પિયનશિપ ટ્રોફીમાં ભારત માટે સૌથી વધુ રન બનાવનાર બેટ્સમેન છે. આ સિવાય ધવને ઓસ્ટ્રેલિયા-ન્યૂઝીલેન્ડની ધરતી પર રમાયેલા 2015 વર્લ્ડ કપમાં પણ ભારત માટે સૌથી વધુ રન બનાવ્યા હતા.
શિખર ધવનને હવે ભારત તરફથી ટેસ્ટ અને ટી-20 રમવાની તક મળી રહી નથી. પરંતુ આ મહિને વેસ્ટ ઈન્ડિઝમાં યોજાનારી ત્રણ મેચની વનડે શ્રેણીમાં શિખર ધવન ટીમ ઈન્ડિયાની કમાન સંભાળતો જોવા મળશે.