IND VS ENG: ભારતીય ક્રિકેટ ટીમના સ્ટાર ઓલરાઉન્ડર રવિન્દ્ર જાડેજાએ વર્લ્ડ ટેસ્ટ ચેમ્પિયનશિપ (WTC) માં એક એવો રેકોર્ડ બનાવ્યો છે, જે આજ સુધી કોઈ ખેલાડી કરી શક્યો નથી. ઇંગ્લેન્ડ સામે એજબેસ્ટન ટેસ્ટમાં 89 રનની જોરદાર ઇનિંગ રમ્યા બાદ, જાડેજાએ WTC માં ઘણા રેકોર્ડ બનાવ્યા છે. જાડેજાએ તેની 41મી વર્લ્ડ ટેસ્ટ ચેમ્પિયનશિપ મેચમાં આ સિદ્ધિ મેળવી અને આ સીમાચિહ્ન સુધી પહોંચનાર વિશ્વનો પ્રથમ ખેલાડી બન્યો છે.
વર્લ્ડ ટેસ્ટ ચેમ્પિયનશિપમાં જાડેજાનું વર્ચસ્વ
ઇંગ્લેન્ડ સામેની પાંચ મેચની ટેસ્ટ શ્રેણીની બીજી મેચમાં, જાડેજાએ 89 રન બનાવ્યા અને WTC માં 2000 રન અને 100 થી વધુ વિકેટ લેવાનો વિશ્વ રેકોર્ડ બનાવ્યો. રવિન્દ્ર જાડેજાના અત્યાર સુધીના આંકડા તેને ટેસ્ટ ક્રિકેટના શ્રેષ્ઠ ઓલરાઉન્ડરોમાંના એક બનાવે છે.
- કુલ રન- 2000થી વધુ
- કુલ વિકેટ- 132
- સદી- 3
- અર્ધ-સદી- 13
- 5 વિકેટ- 6 વખત
- 4 વિકેટ- 6વખત
આ આંકડાઓ સાથે, જાડેજા વર્લ્ડ ટેસ્ટ ચેમ્પિયનશિપનો સૌથી પ્રભાવશાળી ઓલરાઉન્ડર સાબિત થયો છે.
જાડેજા એજબેસ્ટનમાં ફરી ચમક્યો
એજબેસ્ટનનું મેદાન હંમેશા જાડેજા માટે ખાસ રહ્યું છે. 2022માં પણ, તેણે આ મેદાન પર સદી ફટકારી હતી અને ઋષભ પંત સાથે 222 રનની ભાગીદારી કરી હતી. આ વખતે તેણે ગિલ સાથે 203 રનની ભાગીદારી કરી છે.
ભારતીય ટીમની પહેલી ઇનિંગમાં 211 રનમાં પાંચ વિકેટ પડી ગઈ હતી, ત્યારે જાડેજાએ શુભમન ગિલ સાથે કમાન સંભાળી હતી. બંનેએ છઠ્ઠી વિકેટ માટે 203 રનની ભાગીદારી કરી હતી અને ટીમને મજબૂત સ્થિતિમાં મૂકી હતી. જાડેજાએ 89 રનની ધીરજવાન ઇનિંગ રમી અને ફરી એકવાર બતાવ્યું કે એજબેસ્ટન તેનું પ્રિય મેદાન છે. હવે જાડેજા પોતાની બોલિંગથી પણ પોતાનો જાદુ બતાવવાનો પ્રયાસ કરશે અને એજબેસ્ટનમાં ભારતને ઐતિહાસિક જીત અપાવશે.
શુભમન ગિલે પણ રચ્યો ઈતિહાસ
શુભમન ગિલે બર્મિંગહામ ટેસ્ટમાં 150 રન બનાવીને ઇતિહાસ રચ્યો છે. તે ઈંગ્લેન્ડ સામે તેની જ ધરતી પર 150 કે તેથી વધુ રન બનાવનાર માત્ર બીજો ભારતીય કેપ્ટન બન્યો છે. આ શાનદાર સદીના આધારે, તે એન્ડરસન-તેંડુલકર ટ્રોફીમાં 300 રન બનાવનાર પ્રથમ ખેલાડી બન્યો છે. તમને જણાવી દઈએ કે ભારત-ઈંગ્લેન્ડ શ્રેણીનું નામ 'પટૌડી ટ્રોફી' થી બદલીને 'એન્ડરસન-તેંડુલકર' ટ્રોફી કરવામાં આવ્યું હતું.
શુભમન ગિલ હવે મોહમ્મદ અઝહરુદ્દીન પછી બીજા ભારતીય કેપ્ટન બન્યો છે જેમણે ઈંગ્લેન્ડમાં ઈંગ્લેન્ડ સામે ટેસ્ટ ઇનિંગ્સમાં 150 રનનો આંકડો પાર કર્યો છે. અઝહરુદ્દીને 1990માં આ કર્યું હતું. તમને જણાવી દઈએ કે ભારતીય ટીમે 19932માં પોતાની પહેલી ટેસ્ટ રમી હતી. છેલ્લા 93 વર્ષમાં, ફક્ત 2 ભારતીય કેપ્ટન જ ઈંગ્લેન્ડમાં ઈંગ્લેન્ડ સામે કેપ્ટન તરીકે 150 રનનો આંકડો સ્પર્શી શક્યા છે. શુભમન ગિલ પણ ટેસ્ટ ક્રિકેટમાં ઇંગ્લેન્ડ સામે 1,000 રન બનાવવાની નજીક પહોંચી ગયો છે. આ લેખ લખતી વખતે, ગિલે ઇંગ્લેન્ડ સામે 21 ટેસ્ટ ઇનિંગ્સમાં 900 થી વધુ રન બનાવ્યા છે.
ઇંગ્લેન્ડમાં સૌથી વધુ સ્કોર બનાવનારા ભારતીય કેપ્ટન
મોહમ્મદ અઝહરુદ્દીન એ ખેલાડી છે જેણે ભારતીય કેપ્ટન તરીકે ઇંગ્લેન્ડની ધરતી પર સૌથી વધુ વ્યક્તિગત સ્કોર બનાવ્યો છે. તેમણે 1990 માં ઇંગ્લેન્ડમાં 179 રન બનાવ્યા હતા. બર્મિંગહામમાં શુભમન ગિલની ઇનિંગ્સ હજુ પણ ચાલુ છે અને તે ઇંગ્લેન્ડની ધરતી પર સૌથી વધુ વ્યક્તિગત સ્કોર બનાવનારા ભારતીય કેપ્ટનોની યાદીમાં બીજા સ્થાને છે. વિરાટ કોહલીએ 2018 માં 149 રનની ઇનિંગ્સ રમી હતી. આ યાદીમાં મન્સૂર અલી ખાન પટૌડી ચોથા સ્થાને હતા, જેમણે 1967 માં 148 રનની ઇનિંગ્સ રમી હતી.