India vs South Africa, 2nd Test: ભારત અને દક્ષિણ આફ્રિકા વચ્ચે 2 ટેસ્ટ મેચની શ્રેણીની બીજી ટેસ્ટ 3 જાન્યુઆરીથી રમાશે. બંને ટીમો કેપટાઉનના મેદાન પર સામસામે ટકરાશે. પરંતુ આ મેચ પહેલા કેપટાઉનની પીચની જે તસવીરો સામે આવી રહી છે તે ટીમ ઈન્ડિયાને ડરાવે તેવી છે. કેપટાઉનની પિચની તસવીર સોશિયલ મીડિયા પર ઝડપથી વાયરલ થઈ રહી છે. આ વાયરલ તસવીરમાં જોઈ શકાય છે કે કેપટાઉનની પીચ પર ઘાસ દેખાઈ રહ્યું છે. એટલે કે પ્રથમ નજરમાં પિચ જોયા બાદ એવું માનવામાં આવે છે કે ફાસ્ટ બોલરોને મદદ મળશે.
કેપટાઉનમાં ટીમ ઈન્ડિયાની મુશ્કેલીઓ વધશે!
જો કેપટાઉન પિચ પર ઝડપી બોલરોને મદદ મળશે તો ભારતીય બેટ્સમેનોની મુશ્કેલી વધી શકે છે. પ્રથમ ટેસ્ટમાં ભારતીય બેટ્સમેનો સેન્ચુરિયનની પિચ પર દક્ષિણ આફ્રિકાના ઝડપી બોલર કાગિસો રબાડા, નાન્દ્રે બર્જર અને માર્કો યુનસેન સામે છૂટતી રમી શક્યા નહોતા. પરિણામે, રોહિત શર્માની આગેવાની હેઠળની ભારતીય ટીમ માત્ર 3 દિવસમાં એક ઇનિંગ્સ અને 32 રનથી હારી ગઈ. જો કે, સેન્ચુરિયન ટેસ્ટની પ્રથમ ઇનિંગમાં ભારતીય ટીમના વિકેટકીપર બેટ્સમેન કેએલ રાહુલે ચોક્કસપણે સદી ફટકારી હતી, પરંતુ મોટાભાગના ભારતીય બેટ્સમેન સંઘર્ષ કરતા જોવા મળ્યા હતા.
દક્ષિણ આફ્રિકા પાસે છે શાનદાર ઝડપી બોલરો
કાગિસો રબાડા સિવાય, દક્ષિણ આફ્રિકાની ટીમમાં નાન્દ્રે બર્જર અને માર્કો યુનસેન જેવા ઝડપી બોલર છે. આ સિવાય લુંગી એનગિડીને કેપટાઉન ટેસ્ટમાં પ્લેઈંગ 11નો હિસ્સો બનાવવામાં આવી શકે છે. આ રીતે કેપટાઉન પિચ પર દક્ષિણ આફ્રિકાના ઝડપી બોલરો ભારતીય બેટ્સમેનો માટે મુશ્કેલી બની શકે છે. તમને જણાવી દઈએ કે ભારત અને દક્ષિણ આફ્રિકા વચ્ચે બીજી ટેસ્ટ 3 જાન્યુઆરીથી કેપટાઉનમાં રમાશે. દક્ષિણ આફ્રિકાએ પ્રથમ ટેસ્ટમાં ભારતીય ટીમને આસાનીથી હરાવ્યું હતું. સેન્ચુરિયન ટેસ્ટમાં ભારતીય ટીમને એક ઇનિંગ્સ અને 32 રને હારનો સામનો કરવો પડ્યો હતો.
કોહલી પાસે આ રેકોર્ડની તક
કોહલીએ પ્રથમ ટેસ્ટની પ્રથમ ઇનિંગમાં 38 રન અને બીજી ઇનિંગમાં 76 રન બનાવ્યા હતા. તે શાનદાર ફોર્મમાં છે. તેની પાસે દક્ષિણ આફ્રિકાની ધરતી પર ટેસ્ટ ક્રિકેટમાં 1000 રન પૂરા કરવાની તક છે. કોહલીએ અત્યાર સુધી આઠ ટેસ્ટ મેચોની 16 ઇનિંગ્સમાં 52.06ની એવરેજથી 833 રન બનાવ્યા છે. દક્ષિણ આફ્રિકામાં તેણે બે સદી અને ચાર અડધી સદી ફટકારી છે. જો તે બીજી ટેસ્ટમાં 167 રન બનાવશે તો તે 1000 રન પૂરા કરશે.