IND vs SA T20 World Cup 2024: વડાપ્રધાન નરેન્દ્ર મોદીએ રવિવારે (30 જૂન) ભારતીય ક્રિકેટ ટીમ સાથે ફોન પર વાત કરી અને સમગ્ર ટીમને અભિનંદન પાઠવ્યા છે. તેણે રોહિત શર્માને તેની શાનદાર કેપ્ટનશીપ માટે અભિનંદન આપ્યા અને તેની ટી20 કારકિર્દીની પ્રશંસા કરી. પીએમ મોદીએ ફાઇનલમાં વિરાટ કોહલીની ઇનિંગ અને ભારતીય ક્રિકેટમાં તેના યોગદાનની પણ પ્રશંસા કરી હતી. રોહિત શર્મા અને વિરાટ કોહલીએ પણ ટી20 વર્લ્ડકપ જીત્યા બાદ ક્રિકેટના આ સૌથી ટૂંકા ફોર્મેટમાંથી નિવૃત્તિની જાહેરાત કરી દીધી છે.
પીએમ મોદીએ છેલ્લી ઓવર માટે હાર્દિક પંડ્યા અને તેના કેચ માટે સૂર્યકુમાર યાદવના વખાણ કર્યા હતા. તેણે જસપ્રીત બુમરાહના યોગદાનની પણ પ્રશંસા કરી. પીએમએ ભારતીય ક્રિકેટમાં યોગદાન માટે રાહુલ દ્રવિડનો પણ આભાર માન્યો હતો. હાર્દિક પંડ્યાએ છેલ્લી ઓવરોમાં શાનદાર બોલિંગ કરી હતી. સૂર્યકુમારે ખતરનાક દેખાતા ડેવિડ મિલરનો કેચ પકડ્યો હતો જેનાથી આખી મેચ પલટાઈ ગઈ હતી. એ જ રીતે બુમરાહે પણ પોતાની શાનદાર બોલિંગના આધારે ભારતીય ટીમને મેચમાં પરત લાવ્યો હતો.
તમે વર્લ્ડકપની સાથે સાથે લોકોનું દિલ જીતી લીધુ છે - પીએ મોદી
વડાપ્રધાન નરેન્દ્ર મોદીએ શનિવારે (29 જૂન) રાત્રે ટીમ ઈન્ડિયાની વર્લ્ડકપ જીત બાદ એક વીડિયો મેસેજ જાહેર કર્યો હતો. જેમાં તેણે ટીમ ઈન્ડિયાને જીત માટે અભિનંદન આપ્યા અને ચેમ્પિયન જાહેર કર્યા. તેણે કહ્યું કે ટીમ ઈન્ડિયાના ખેલાડીઓએ વર્લ્ડકપની સાથે સાથે કરોડો લોકોના દિલ જીતી લીધા છે. ભારતીય ક્રિકેટ ટીમે 17 વર્ષની રાહનો અંત આણ્યો અને શનિવારે ખૂબ જ રોમાંચક મેચમાં દક્ષિણ આફ્રિકાને સાત રનથી હરાવીને ટી20 વર્લ્ડકપનો ખિતાબ જીત્યો.
અમને ભારતીય ટીમ પર ગર્વ છે - પીએમ મોદી
ટ્વિટર પર પોસ્ટ કરવામાં આવેલા વીડિયોમાં પીએમ મોદીએ કહ્યું, "ચેમ્પિયનો! અમારી ટીમ ટી20 વર્લ્ડકપને શાનદાર સ્ટાઈલમાં જીતીને લાવી છે. અમને ભારતીય ક્રિકેટ ટીમ પર ગર્વ છે." તેમણે કહ્યું કે 140 કરોડથી વધુ ભારતીયો આપણા તમામ ક્રિકેટરોના પ્રદર્શન પર ગર્વ અનુભવી રહ્યા છે. પીએમે કહ્યું કે તેણે મેદાન પર કપ જીત્યો છે અને દેશના દરેક ગામ અને શેરીમાં કરોડો ભારતીયોના દિલ જીતી લીધા છે. તેણે કહ્યું કે ભારત આખી ટૂર્નામેન્ટમાં એક પણ મેચ હાર્યું નથી. આ કોઈ નાની સિદ્ધિ નથી, કારણ કે તેમાં ઘણી ટીમો હતી.
રોમાંચક મેચમાં ટીમ ઇન્ડિયાને મળી જીત
17 વર્ષની લાંબી રાહ બાદ ભારતીય ટીમે ફરી એકવાર ટી20 વર્લ્ડકપનો ખિતાબ જીત્યો છે, પરંતુ આ જીત એટલી સરળતાથી મળી ના હતી. એક સમયે સાઉથ આફ્રિકાની મેચ પર મજબૂત પકડ હતી. જોકે, ત્યારપછી ભારતીય બોલરોએ મેચનો પલટો ફેરવી દીધો અને છેલ્લી ઓવરોમાં શાનદાર બોલિંગ કરી, જેના પરિણામે ભારતે 7 રનથી જીત મેળવી. આ જીતના હીરો હાર્દિક પંડ્યા, જસપ્રીત બુમરાહ, વિરાટ કોહલી અને અર્શદીપ સિંહ રહ્યા છે.