મુંબઈમાં સ્કૂલ ચેમ્પિયનશીપમાં રીઝવી સ્પ્રિંગફિલ્ડ સ્કૂલ માટે રમતાં માત્ર 14 વર્ષની વયે 330 બોલમાં 546 રન ફટકારીને લાઈમ લાઈટમાં આવેલા પૃથ્વીને 2016માં રણજી ટ્રોફીમાં તમિલનાડુ સામે સેમી ફાઈનલમાં તક મળી હતી. આ મેચની બીજી ઈનિંગ્સમાં સદી ફટકારીને શોએ મુંબઈને જીત અપાવીને ફાઈનલમાં પહોંચાડ્યું હતું. શો દુલીપ ટ્રોફીની પહેલી મેચમાં પણ સદી ફટકારવાનો રેકોર્ડ ધરાવે છે. પૃથ્વી શોના નેતૃત્વમાં ભારતે અંડર 19 વર્લ્ડકપ જીત્યો હતો.
ટોસ જીત્યા બાદ ભારતીય કેપ્ટન વિરાટ કોહલીએ કહ્યું કે, અહીં સારી વિકેટ (Wicket) લાગી રહી છે અને બોર્ડ પર રન બનાવવું હંમેશાં સારું હોય છે. તેમણે આશા વ્યક્ત કરી હતી કે તે વિરોધી ટીમ પર દબાણ બનાવી શકશે.