IPL 2026 auction live: ક્રિકેટની દુનિયામાં તહેવાર સમાન ગણાતી ઈન્ડિયન પ્રીમિયર લીગ (IPL) ની 2026 ની સીઝન માટેની તૈયારીઓ આખરી તબક્કામાં છે. આવતીકાલે, એટલે કે 16 ડિસેમ્બરના રોજ અબુ ધાબી ખાતે ખેલાડીઓની હરાજી (Auction) યોજાશે. ભલે આ મીની હરાજી હોય, પરંતુ તેમાં તમામ 10 ફ્રેન્ચાઈઝી વચ્ચે જોરદાર રસાકસી જોવા મળશે. હરાજીની પ્રક્રિયા ભારતીય સમય મુજબ બપોરે 2:30 વાગ્યે શરૂ થશે. ચાહકો આ લાઈવ એક્શન ટીવી પર સ્ટાર સ્પોર્ટ્સ નેટવર્ક અને મોબાઈલ પર JioHotstar એપના માધ્યમથી નિહાળી શકશે.
આ વખતની હરાજી માટે કુલ 1,300 થી વધુ ખેલાડીઓએ રજીસ્ટ્રેશન કરાવ્યું હતું, પરંતુ સ્ક્રૂટિની બાદ માત્ર 350 ખેલાડીઓને શોર્ટલિસ્ટ કરવામાં આવ્યા છે. જોકે, તમામ 10 ટીમોના સ્ક્વોડમાં મળીને કુલ 77 સ્લોટ (જગ્યા) જ ખાલી છે. એટલે કે, 350 માંથી મહત્તમ 77 ખેલાડીઓનું નસીબ ચમકશે. આ યાદીમાં ડેવોન કોનવે, કેમેરોન ગ્રીન, લિયામ લિવિંગસ્ટોન અને સરફરાઝ ખાન જેવા મોટા સ્ટાર્સ સામેલ છે, જેના પર મોટી બોલી લાગવાની શક્યતા છે.
ટીમોના પર્સ (બજેટ) ની વાત કરીએ તો, કોલકાતા નાઈટ રાઈડર્સ (KKR) આ હરાજીમાં 'કિંગ' બનીને ઉતરશે. KKR પાસે સૌથી વધુ ₹64.30 કરોડ જમા છે અને તેમની પાસે સૌથી વધુ 13 ખેલાડીઓ ખરીદવાની જગ્યા પણ ખાલી છે. બીજી તરફ, ચેન્નાઈ સુપર કિંગ્સ (CSK) પણ મજબૂત સ્થિતિમાં છે, તેમના ખાતામાં ₹43.4 કરોડ છે. આ બંને ટીમો મોટા ખેલાડીઓને ખરીદવા માટે કોઈ કસર છોડશે નહીં તે નક્કી છે.
બીજી બાજુ, પાંચ વખતની ચેમ્પિયન મુંબઈ ઈન્ડિયન્સ (MI) આ વખતે સૌથી ટાઈટ બજેટ સાથે મેદાનમાં છે. મુંબઈ પાસે માત્ર ₹2.75 કરોડ જ બાકી છે અને તેમણે 5 ખેલાડીઓના સ્લોટ ભરવાના છે. આ સ્થિતિમાં મુંબઈ ઈન્ડિયન્સે ખૂબ જ સમજી-વિચારીને સસ્તા અને સારા વિકલ્પો પર દાવ લગાવવો પડશે. ગુજરાત ટાઇટન્સ પાસે પણ 5 સ્લોટ ખાલી છે, જ્યારે સનરાઈઝર્સ હૈદરાબાદ 10 નવા ખેલાડીઓ ખરીદી શકે છે.
અન્ય ટીમોના બજેટ પર નજર કરીએ તો, સનરાઈઝર્સ હૈદરાબાદ (SRH) પાસે ₹25.5 કરોડ, લખનૌ સુપર જાયન્ટ્સ (LSG) પાસે ₹22.95 કરોડ, રોયલ ચેલેન્જર્સ બેંગ્લોર (RCB) પાસે ₹16.4 કરોડ અને રાજસ્થાન રોયલ્સ (RR) પાસે ₹16.05 કરોડ ઉપલબ્ધ છે. પંજાબ કિંગ્સ (PBKS) પાસે ₹11.5 કરોડનું પર્સ બાકી છે.
આમ, અબુ ધાબીમાં યોજાનારી આ હરાજી માત્ર પૈસાની નહીં પણ રણનીતિની લડાઈ હશે. જેમની પાસે વધુ પૈસા છે તેઓ મોટા સ્ટાર્સને ટાર્ગેટ કરશે, જ્યારે ઓછા બજેટવાળી ટીમો 'સ્માર્ટ બાય' પર ધ્યાન કેન્દ્રિત કરશે. આવતીકાલે બપોરે 2:30 વાગ્યાથી ક્રિકેટ રસિયાઓ માટે આ રોમાંચક જંગ શરૂ થઈ જશે.