Rishabh Pant Test sixes record: ભારત અને શ્રીલંકા વચ્ચે રમાઈ રહેલી ગેલ ટેસ્ટ મેચમાં ભારતીય ટીમના વિસ્ફોટક વિકેટકીપર-બેટ્સમેન ઋષભ પંતે એક મોટો ઇતિહાસ રચી દીધો છે. ભલે પંત પ્રથમ દાવમાં કોઈ મોટી ઇનિંગ કે સદી ન ફટકારી શક્યો હોય, પરંતુ તેણે પોતાની 39 રનની ઇનિંગ દરમિયાન એક એવો રેકોર્ડ પોતાના નામે કર્યો છે જેણે ઓસ્ટ્રેલિયાના દિગ્ગજ ખેલાડી એડમ ગિલક્રિસ્ટને પાછળ પાડી દીધો છે.
એક સિક્સર અને તૂટી ગયો ગિલક્રિસ્ટનો રેકોર્ડ!
શ્રીલંકા સામેની પ્રથમ ઇનિંગમાં પંતે 62 બોલનો સામનો કરીને 4 ચોગ્ગા અને 1 ગગનચુંબી છગ્ગાની મદદથી 39 રન બનાવ્યા હતા. આ એકમાત્ર છગ્ગો ફટકારતાની સાથે જ પંતે ટેસ્ટ ક્રિકેટમાં 'ઘરઆંગણે સૌથી વધુ સિક્સર' ફટકારવાના મામલે પૂર્વ ઓસ્ટ્રેલિયન વિકેટકીપર એડમ ગિલક્રિસ્ટને પાછળ છોડી દીધો. હવે પંત ઘરઆંગણે સૌથી વધુ ટેસ્ટ સિક્સર ફટકારનારો વિશ્વનો બીજા નંબરનો બેટ્સમેન બની ગયો છે. જ્યારે ગિલક્રિસ્ટ હવે ત્રીજા સ્થાને ધકેલાયો છે.
પંતના ખાતામાં હવે ઘરઆંગણે 57 ટેસ્ટ સિક્સર થઈ ગઈ છે, જ્યારે ગિલક્રિસ્ટના નામે 56 સિક્સર હતી. આ લિસ્ટમાં ઇંગ્લેન્ડનો વર્તમાન કેપ્ટન બેન સ્ટોક્સ 69 સિક્સર સાથે સૌથી ટોચ પર (પહેલા નંબરે) છે.
જાણો ઘરઆંગણે સૌથી વધુ ટેસ્ટ સિક્સર મારનારા ટોપ-5 બેટ્સમેન:
બેન સ્ટોક્સ (ઇંગ્લેન્ડ) - 69 સિક્સર
ઋષભ પંત (ભારત) - 57 સિક્સર
એડમ ગિલક્રિસ્ટ (ઓસ્ટ્રેલિયા) - 56 સિક્સર
ક્રિસ ગેલ (વેસ્ટ ઇન્ડીઝ) - 51 સિક્સર
જેક્સ કાલિસ (સાઉથ આફ્રિકા) - 45 સિક્સર
પંત હવે 100 સિક્સરની સિદ્ધિથી માત્ર 2 ડગલાં દૂર
ઋષભ પંત પોતાના આક્રમક અંદાજ માટે જાણીતો છે. તેણે અત્યાર સુધીની પોતાની ટેસ્ટ કારકિર્દીમાં કુલ 98 સિક્સર ફટકારી દીધી છે. હવે તે ટેસ્ટ ક્રિકેટમાં 100 સિક્સર મારનારા બેટ્સમેનોની ખાસ ક્લબમાં સામેલ થવાથી માત્ર 2 જ સિક્સર દૂર છે. જો પંત ગેલ ટેસ્ટના બીજા દાવમાં પણ પોતાની બેટિંગનો જાદુ બતાવશે, તો તે આ જ મેચમાં 100 સિક્સરનો જાદુઈ આંકડો પાર કરી શકે છે. સમગ્ર ટેસ્ટ ક્રિકેટમાં સૌથી વધુ 138 સિક્સર મારવાનો રેકોર્ડ બેન સ્ટોક્સના નામે છે.
ટેસ્ટ ક્રિકેટમાં ઓવરઓલ સૌથી વધુ સિક્સર ફટકારનારા 5 ખેલાડીઓ:
બેન સ્ટોક્સ (ઇંગ્લેન્ડ) - 138 સિક્સર
બ્રેન્ડન મેક્કુલમ (ન્યૂઝીલેન્ડ) - 107 સિક્સર
એડમ ગિલક્રિસ્ટ (ઓસ્ટ્રેલિયા) - 100 સિક્સર
ઋષભ પંત (ભારત) - 98 સિક્સર*
ટિમ સાઉથી (ન્યૂઝીલેન્ડ) - 98 સિક્સર
આ પણ વાંચોઃ IND vs SL Day 2 Highlights: બીજા દિવસે ભારત 460/9, દેવદત્ત પડિકલની 167 રનની ઐતિહાસિક
કેવી રહી છે પંતની શાનદાર ટેસ્ટ કારકિર્દી?
ઓગસ્ટ 2018 માં ટેસ્ટ ડેબ્યૂ કરનારા ઋષભ પંતે અત્યાર સુધીમાં 51 ટેસ્ટ મેચ રમી છે. જેની 88 ઇનિંગ્સમાં તેણે 43.33 ની શાનદાર સરેરાશથી કુલ 3596 રન ફટકાર્યા છે. આ દરમિયાન તેના બેટમાંથી 8 સદી અને 19 અડધી સદી નીકળી છે. કાર અકસ્માત બાદ મેદાન પર પાછા ફરેલા પંતનું ફોર્મ જોતા એવું લાગે છે કે તે આગામી સમયમાં ભારતીય ક્રિકેટ માટે હજુ ઘણા નવા કીર્તિમાનો સ્થાપિત કરશે.