IND vs ENG: ઈંગ્લેન્ડ સામે ચાલી રહેલી પાંચ ટેસ્ટ મેચની શ્રેણીમાં ભારતનું પ્રદર્શન શાનદાર રહ્યું છે. ભારતે 3-1ની લીડ મેળવી લીધી છે અને ધર્મશાલામાં ચાલી રહેલી પાંચમી ટેસ્ટ મેચમાં બીજા દિવસની રમત પૂરી થયા બાદ ટીમ પાસે 255 રનની શાનદાર લીડ છે. આ શ્રેણીમાં ખાસ કરીને ભારતના ટોચના ત્રણ બેટ્સમેનોએ શાનદાર પ્રદર્શન કર્યું છે. રોહિત શર્મા, યશસ્વી જયસ્વાલ અને શુભમન ગિલની ત્રિપુટી સતત અડધી સદી અને સદીની ઇનિંગ્સ રમી રહી છે. હવે રોહિત, જયસ્વાલ અને ગિલની જોડીએ એક અનોખો રેકોર્ડ બનાવ્યો છે.


 






રોહિત-ગિલ-જયસ્વાલે 67 વર્ષ પછી કમાલ કરી બતાવી


ભારત અને ઈંગ્લેન્ડ વચ્ચેની પાંચ મેચની ટેસ્ટ શ્રેણીમાં અત્યાર સુધીમાં સૌથી વધુ રન બનાવનાર બેટ્સમેન યશસ્વી જયસ્વાલ છે, જેણે અત્યાર સુધી 5 મેચની 9 ઇનિંગ્સમાં 712 રન બનાવ્યા છે. બીજી તરફ કેપ્ટન રોહિત શર્માએ પણ સિરીઝમાં 400 રનનો આંકડો પાર કરી લીધો છે. અત્યાર સુધીમાં તેણે આ સિરીઝમાં 5 મેચમાં 400 રન બનાવ્યા છે અને તેના સિવાય શુભમન ગિલ પણ આ લિસ્ટમાં સામેલ થઈ ગયો છે. ગિલે ઈંગ્લેન્ડ સામેની ટેસ્ટ શ્રેણીમાં રમાયેલી 5 મેચમાં અત્યાર સુધીમાં 452 રન બનાવ્યા છે.


રોહિત-ગિલ-જયસ્વાલ એક જ શ્રેણીમાં એકસાથે 400 કે તેથી વધુ રન બનાવનારી ભારતીય ટીમની પ્રથમ ત્રિપુટી બની છે. અગાઉ, 1955-56માં ન્યુઝીલેન્ડ સામે, આ પ્રથમ વખત બન્યું હતું કે કોઈ 3 ભારતીય બેટ્સમેનોએ એક જ શ્રેણીમાં 300 કે તેથી વધુ રન બનાવ્યા હોય. ન્યુઝીલેન્ડ સામેની તે શ્રેણીમાં મુલવંતરાય માંકડે 526, વિજય માંજરેકરે 386 અને પોલી ઉમરીગરે 351 રન બનાવ્યા હતા. જો આપણે ઈંગ્લેન્ડ સામેની વર્તમાન શ્રેણીની વાત કરીએ તો રોહિત શર્મા, શુભમન ગિલ અને યશસ્વી જયસ્વાલ ત્રણેય 2-2 સદીની ઇનિંગ્સ રમી ચૂક્યા છે. આ 3 બેટ્સમેન સિવાય અન્ય કોઈ ખેલાડી શ્રેણીમાં 2 સદી ફટકારી શક્યો નથી.


બીજા દિવસની રમત સમાપ્ત


ધર્મશાલામાં રમાઈ રહેલી પાંચમી ટેસ્ટ પર પણ ટીમ ઈન્ડિયાએ પોતાની પકડ મજબૂત કરી લીધી છે. ઈંગ્લેન્ડે પ્રથમ દાવમાં બનાવેલા 218 રનના જવાબમાં ટીમ ઈન્ડિયાએ બીજા દિવસની રમતના અંતે 8 વિકેટ ગુમાવીને 473 રન બનાવી લીધા છે. ટીમ ઈન્ડિયાની લીડ વધીને 255 રન થઈ ગઈ છે. સ્ટમ્પના સમયે જસપ્રીત બુમરાહ 55 બોલમાં બે ચોગ્ગાની મદદથી 19 રન બનાવીને અણનમ અને કુલદીપ યાદવ 55 બોલમાં 2 ચોગ્ગાની મદદથી 27 રન બનાવીને અણનમ પરત ફર્યા હતા. ભારત તરફથી રોહિત શર્મા અને શુભમન ગીલે સદી ફટકારી હતી. જ્યારે ઈંગ્લેન્ડ તરફથી ઓફ સ્પિનર ​​શોએબ બશીરે ચાર વિકેટ ઝડપી હતી.