Mohammed Shami News: લગભગ આઠ મહિના થી ભારતીય ટીમથી દૂર રહેલા અનુભવી ફાસ્ટ બોલર મોહમ્મદ શમી ની તાજેતરમાં નવા રાષ્ટ્રીય પસંદગીકાર આરપી સિંહ સાથે મુલાકાત થઈ છે. શમી હાલમાં રણજી ટ્રોફીમાં બંગાળ તરફથી રમી રહ્યો છે, જ્યાં તે ફિટનેસના અભાવ અંગેના મુખ્ય પસંદગીકાર અજિત અગરકરના નિવેદનને ખોટું સાબિત કરી રહ્યો છે. શમીએ 2025-26 રણજી ટ્રોફી સીઝનની માત્ર ત્રણ ઇનિંગમાં 10 વિકેટ ઝડપી છે. રવિવારે, બંગાળ અને ગુજરાત વચ્ચેની મેચ દરમિયાન, આરપી સિંહે ઇડન ગાર્ડન્સ ખાતે શમી સાથે વાતચીત કરી હતી. આ મુલાકાત એવા સમયે થઈ છે જ્યારે શમીના પર્ફોર્મન્સથી તેની ટીમ ઈન્ડિયામાં વાપસીની આશા વધુ પ્રબળ બની છે.
ચેમ્પિયન્સ ટ્રોફી બાદ શમીની ટીમ ઈન્ડિયામાંથી ગેરહાજરી
ભારતીય ટીમનો મહત્ત્વનો ફાસ્ટ બોલર મોહમ્મદ શમી છેલ્લે ચેમ્પિયન્સ ટ્રોફીની ફાઇનલમાં ભારતીય ટીમ માટે રમતો જોવા મળ્યો હતો. ત્યારથી, તેને ટેસ્ટ, T20 કે ODI, એકપણ ફોર્મેટમાં ટીમમાં સ્થાન મળ્યું નથી. તાજેતરમાં, મુખ્ય પસંદગીકાર અજિત અગરકરે નિવેદન આપ્યું હતું કે શમી સંપૂર્ણપણે ફિટ ન હોવાને કારણે તેને ટીમમાં સામેલ કરવામાં આવ્યો નથી. જોકે, શમીએ આનાથી વિપરીત પોતાને સંપૂર્ણ ફિટ ગણાવ્યો હતો, જેના પગલે તેને રણજી ટ્રોફીમાં રમવાની મંજૂરી મળી હતી.
રણજી ટ્રોફીમાં શમીનો દમદાર દેખાવ
ટીમ ઈન્ડિયામાંથી બહાર રહ્યા પછી મોહમ્મદ શમીએ સ્થાનિક સ્તરે બંગાળ તરફથી રણજી ટ્રોફીમાં વાપસી કરી છે. હાલમાં તે ગુજરાત સામેની પોતાની બીજી મેચ રમી રહ્યો છે. શમીએ તેની ફિટનેસ અને ફોર્મ બંને સાબિત કરી દીધા છે. 2025-26 રણજી ટ્રોફી સીઝનની અત્યાર સુધીની માત્ર ત્રણ ઇનિંગમાં તેણે કુલ 10 વિકેટ ઝડપી છે. ગુજરાત સામેની પ્રથમ ઇનિંગમાં પણ તેણે 18.3 ઓવર ફેંકીને 3 મહત્ત્વપૂર્ણ વિકેટો ઝડપી હતી.
પસંદગીકાર આરપી સિંહની શમી સાથે મુલાકાત
જ્યારે શમી અને મુખ્ય પસંદગીકાર અજિત અગરકર વચ્ચેના ફિટનેસ વિવાદની ચર્ચા ચાલી રહી હતી, ત્યારે એક મહત્ત્વની ઘટના બની છે. રવિવારે, બંગાળ વિરુદ્ધ ગુજરાત મેચના બીજા દિવસે, ટીમ ઈન્ડિયાના નવા પસંદગીકારોમાંના એક અને ભૂતપૂર્વ ભારતીય ક્રિકેટર આરપી સિંહ શમીને મળવા ઈડન ગાર્ડન્સ પહોંચ્યા હતા. સ્પોર્ટ્સકીડાના અહેવાલ મુજબ, બીજા દિવસની રમત સમાપ્ત થયા પછી આરપી સિંહે મોહમ્મદ શમી સાથે વિગતવાર વાતચીત કરી હતી. આ મુલાકાત શમીની ટીમ ઈન્ડિયામાં વાપસીની સંભાવનાઓને વધુ મજબૂત કરે છે.
અજિત અગરકરના નિવેદનને ખોટું સાબિત કરતો શમીનો પર્ફોર્મન્સ
મુખ્ય પસંદગીકાર અજિત અગરકરે શમીને વેસ્ટ ઈન્ડિઝ સામેની ટેસ્ટ શ્રેણીમાં તક ન આપવા પાછળ ફિટનેસના અભાવને કારણભૂત ગણાવ્યો હતો. જોકે, રણજી ટ્રોફીમાં શમીનું પ્રદર્શન આ નિવેદનને ખોટું સાબિત કરી રહ્યું છે. ઉત્તરાખંડ સામેની અગાઉની મેચમાં, શમીએ બંને ઇનિંગમાં કુલ 39.3 ઓવર ફેંકી હતી અને 7 વિકેટો લીધી હતી, જે એક ફાસ્ટ બોલર માટે લાંબા ગાળાની બોલિંગ ફિટનેસ દર્શાવે છે. ગુજરાત સામે પણ તેણે પોતાની ગતિ જાળવી રાખી છે. શમીનું આ સતત અને સારું પ્રદર્શન તેને રાષ્ટ્રીય ટીમમાં પાછો લાવવા માટે મજબૂત દાવેદાર બનાવે છે.