SL vs AUS T20 World Cup: ટી20 વર્લ્ડ કપ 2026 માં સોમવાર, 16 ફેબ્રુઆરી 2026 ના રોજ રમાયેલી 30 મી લીગ મેચમાં સહ યજમાન શ્રીલંકાએ ઓસ્ટ્રેલિયાને 8 વિકેટથી હરાવીને ટૂર્નામેન્ટમાં મોટો ઉલટફેર કર્યો છે. શ્રીલંકાના પથુમ નિસાન્કાએ માત્ર 52 બોલમાં અણનમ 100* રન ફટકારીને આ વર્લ્ડ કપની પ્રથમ સદી નોંધાવી અને પોતાની ટીમને સુપર 8 માં પહોંચાડી દીધી છે. ઓસ્ટ્રેલિયાએ આપેલા 182 રનના લક્ષ્યાંકને શ્રીલંકાએ માત્ર 18 ઓવરમાં જ વટાવી લીધો હતો. આ કારમી હાર બાદ ભૂતપૂર્વ ચેમ્પિયન ઓસ્ટ્રેલિયા પર વર્લ્ડ કપમાંથી બહાર ફેંકાઈ જવાનું જોખમ તોળાઈ રહ્યું છે, કારણ કે ગ્રુપ B માં ત્રણ મેચમાં માત્ર એક જીત સાથે કાંગારૂ ટીમ હવે પોઈન્ટ ટેબલમાં ત્રીજા સ્થાને ધકેલાઈ ગઈ છે.
નિસાન્કા અને મેન્ડિસની ઐતિહાસિક ભાગીદારી
182 રનના પીછામાં શ્રીલંકાની શરૂઆત ખરાબ રહી હતી અને કુસલ પરેરા માત્ર 1 રન બનાવી આઉટ થયો હતો. જોકે, ત્યારબાદ પથુમ નિસાન્કા અને કુસલ મેન્ડિસ વચ્ચે સદીની ભાગીદારી થઈ હતી. મેન્ડિસે 38 બોલમાં 51 રનનું યોગદાન આપ્યું હતું. બીજી તરફ નિસાન્કાએ પોતાની ઇનિંગમાં 10 ચોગ્ગા અને 5 છગ્ગા ફટકારીને ઓસ્ટ્રેલિયન બોલરોની લાઇન લેન્થ બગાડી નાખી હતી. શ્રીલંકાએ જે રીતે 18 ઓવરમાં લક્ષ્યાંક પ્રાપ્ત કર્યો તેનાથી તેમનો નેટ રન રેટ પણ ઘણો સુધર્યો છે.
ઓસ્ટ્રેલિયાની બેટિંગ લાઈનઅપમાં ધબડકો
ટોસ હારીને પ્રથમ બેટિંગ કરવા ઉતરેલી ઓસ્ટ્રેલિયાની શરૂઆત ધમાકેદાર રહી હતી. ટ્રેવિસ હેડ (56 રન) અને કેપ્ટન મિશેલ માર્શ (54 રન) એ પ્રથમ વિકેટ માટે માત્ર 9 ઓવરમાં 104 રન જોડી દીધા હતા. એક સમયે એવું લાગતું હતું કે ઓસ્ટ્રેલિયા 220 થી વધુ રન બનાવશે, પરંતુ મધ્યમ ક્રમના બેટ્સમેનો નિષ્ફળ રહેતા ટીમ 20 ઓવરમાં માત્ર 181 રન જ બનાવી શકી હતી. શ્રીલંકન બોલરોએ શાનદાર વાપસી કરીને ઓસ્ટ્રેલિયાને મજબૂત સ્કોર કરતા અટકાવ્યું હતું.
ઓસ્ટ્રેલિયાનું સુપર 8 નું સમીકરણ હવે મુશ્કેલ
ઝિમ્બાબ્વે સામે 23 રનથી હાર્યા બાદ હવે શ્રીલંકા સામેની આ હાર ઓસ્ટ્રેલિયા માટે મોટો ફટકો છે. ઓસ્ટ્રેલિયા હવે 20 ફેબ્રુઆરીએ ઓમાન સામે તેની છેલ્લી લીગ મેચ રમશે. સુપર 8 માં પહોંચવા માટે ઓસ્ટ્રેલિયાએ માત્ર આ મેચ જીતવી જ નહીં, પરંતુ ઝિમ્બાબ્વે અને આયર્લેન્ડ વચ્ચેની મેચના પરિણામ પર પણ નિર્ભર રહેવું પડશે. જો ઝિમ્બાબ્વે આયર્લેન્ડને હરાવી દેશે, તો ઓસ્ટ્રેલિયા સત્તાવાર રીતે વર્લ્ડ કપમાંથી બહાર થઈ જશે.