IND vs PAK T20 World Cup 2026: શ્રીલંકાના કોલંબોમાં રવિવાર, 15 ફેબ્રુઆરીના રોજ રમાનાર ભારત વિરુદ્ધ પાકિસ્તાન (India vs Pakistan) ના હાઈ-વોલ્ટેજ મુકાબલા અગાઉ ભારતીય કેપ્ટન સૂર્યકુમાર યાદવે પ્રેસ કોન્ફરન્સ સંબોધીને મહત્વની જાહેરાતો કરી છે. આર. પ્રેમદાસા સ્ટેડિયમ ખાતે રમાનાર T20 વર્લ્ડ કપ 2026 (T20 World Cup 2026) ની આ મહાજંગ પૂર્વે સૂર્યાએ સ્પષ્ટ કર્યું કે વિસ્ફોટક ઓપનર અભિષેક શર્મા સંપૂર્ણ ફિટ છે અને પ્લેઈંગ ઈલેવનમાં પરત ફરશે. પેટમાં ચેપ (Stomach Infection) ના કારણે નામિબિયા સામેની મેચ ગુમાવનાર અભિષેકની વાપસીથી ભારતીય ટીમની તાકાતમાં વધારો થયો છે. આ બેઠકમાં કેપ્ટને પાકિસ્તાનના રહસ્યમય સ્પિનર અને મેચના દબાણ અંગે પણ નિખાલસતાથી જવાબો આપ્યા હતા.
અભિષેક શર્માં પ્લેઈંગ ઇલેવનનો ભાગ હશે
ભારતીય કેપ્ટન સૂર્યકુમાર યાદવે પુષ્ટિ કરી છે કે પાકિસ્તાન વિરુદ્ધના મહત્વના મુકાબલામાં અભિષેક શર્મા (Abhishek Sharma) ટીમ ઇન્ડિયાના અંતિમ ૧૧ ખેલાડીઓનો ભાગ રહેશે. અભિષેકની આક્રમક બેટિંગ સ્ટાઈલ ભારત માટે મોટો ફાયદો (Advantage) સાબિત થઈ શકે છે. પાકિસ્તાનના નવા સ્પિનર ઉસ્માન તારિકની બિનપરંપરાગત બોલિંગ એક્શન (Bowling Action) અંગે વાત કરતા સૂર્યાએ જણાવ્યું કે ભારતીય ટીમ તેની સામે કોઈ પણ પ્રકારની તૈયારી વગર મેદાને ઉતરશે નહીં. તેણે ઉમેર્યું કે ભલે ઉસ્માન તારિક એક અનોખું વ્યક્તિત્વ હોય અને તેનો સામનો કરવો 'આઉટ ઓફ સિલેબસ' પ્રશ્ન જેવું લાગે, પરંતુ ભારતીય બેટ્સમેનો તેની સામે શરણાગતિ સ્વીકારવાને બદલે પડકાર ઝીલવા માટે તૈયાર અને ઉત્સાહિત છે.
ભારત-પાકિસ્તાન મેચના માનસિક દબાણ (Mental Pressure) અંગે વાત કરતા સૂર્યાએ સ્વીકાર્યું કે આ કોઈ સામાન્ય રમત નથી અને દબાણ અનુભવવું એ માનવ સ્વભાવ છે. આપણે ભલે તેને બીજી સામાન્ય મેચ ગણાવીએ, પરંતુ આ એક ખાસ પ્રસંગ છે કારણ કે બંને ટીમો વારંવાર એકબીજા સામે રમતી નથી. આ ઉપરાંત, ટોસ દરમિયાન પાકિસ્તાની કેપ્ટન સાથે હાથ મિલાવવા (Handshake) જેવા હળવા વિષય પર પણ તેણે રસપ્રદ રીતે ધ્યાન આપવાની વાત કરી હતી. ભારત-પાકિસ્તાન વચ્ચેની દ્વિપક્ષીય શ્રેણી (Bilateral Series) અંગેના પ્રશ્ન પર તેણે સ્પષ્ટતા કરી કે આ બાબત ખેલાડીઓના હાથમાં નથી અને જ્યારે તે યોગ્ય સ્તરે નિર્ણય લેવાની સ્થિતિમાં હશે ત્યારે ચોક્કસ જાણ કરશે.