T20 World Cup 2024: ભારતીય ટીમના તમામ ખેલાડીઓ 1 જૂનથી શરૂ થનારી T20 વર્લ્ડ કપ 2024 ટૂર્નામેન્ટ માટે અમેરિકા પહોંચી ગયા છે. ત્યાં પહોંચ્યા બાદ ટીમ ઈન્ડિયાએ નેટ પ્રેક્ટિસ પણ શરૂ કરી દીધી છે. પરંતુ ટીમના મુખ્ય કોચ રાહુલ દ્રવિડ અને કેપ્ટન રોહિત શર્મા ન્યૂયોર્કમાં સુવિધાઓના અભાવથી પરેશાન છે. ઘણા ખેલાડીઓ પણ ICC દ્વારા આપવામાં આવતી સુવિધાઓથી સંતુષ્ટ નથી.
ટીમ ઈન્ડિયાની આ ફરિયાદ છે
સૂત્રોના જણાવ્યા અનુસાર, ટીમ ઈન્ડિયાને નાસાઉ કાઉન્ટીના ગાર્ડન સિટી વિલેજમાં રાખવામાં આવી છે અને તેને કેન્ટિએગ પાર્કમાં પ્રેક્ટિસની સુવિધા આપવામાં આવી છે. ખેલાડીઓનું કહેવું છે કે આ સુવિધાઓ સામાન્ય છે અને કાયમી ધોરણે તૈયાર કરવામાં આવી નથી. આ સિવાય ન્યૂયોર્કના નાસાઉ કાઉન્ટી ઈન્ટરનેશનલ ક્રિકેટ સ્ટેડિયમમાં પણ કોઈ પ્રેક્ટિસની સુવિધા નથી, જ્યાં ટીમને તેની પ્રથમ મેચ આયરલેન્ડ સામે રમવાની છે.
ટીમ ઈન્ડિયા માટે આ ચિંતાનો વિષય છે કારણ કે તેણે 1 જૂને બાંગ્લાદેશ સામેની પ્રેક્ટિસ મેચ સુધી કેન્ટિએગ પાર્કમાં પ્રેક્ટિસ કરવી પડશે. નોંધનીય છે કે ક્વોલિફાઈ કર્યા બાદ ટીમ ફ્લોરિડા જશે અને પછી વેસ્ટ ઈન્ડિઝમાં સુપર 8 મેચ રમશે. આઈસીસીએ હજુ સુધી આ મામલે કોઈ નિવેદન આપ્યું નથી.
ભારતીય ટીમનો T20 વર્લ્ડ કપ 2024નો કાર્યક્રમ
ભારતીય ટીમ T20 વર્લ્ડ કપમાં પોતાની પ્રથમ મેચ 5 જૂને આયરલેન્ડ સામે રમશે. આ પછી ભારત 9 જૂને પાકિસ્તાન સામે રમશે. ભારત 12 જૂને અમેરિકા સામે અને છેલ્લી મેચ 15 જૂને કેનેડા સામે રમશે.
ભારતીય ટીમ
રોહિત શર્મા (કેપ્ટન), હાર્દિક પંડ્યા (વાઈસ-કેપ્ટન), યશસ્વી જયસ્વાલ, વિરાટ કોહલી, સૂર્યકુમાર યાદવ, રિષભ પંત (વિકેટ-કીપર), સંજુ સેમસન (વિકેટ-કીપર), શિવમ દુબે, રવિન્દ્ર જાડેજા, અક્ષર પટેલ , કુલદીપ યાદવ, યુઝવેન્દ્ર ચહલ, અર્શદીપ સિંહ, જસપ્રીત બુમરાહ, મોહમ્મદ સિરાજ.
રિઝર્વ: શુભમન ગિલ, રિંકુ સિંહ, ખલીલ અહેમદ અને અવેશ ખાન