India vs Australia WTC Final : વર્લ્ડ ટેસ્ટ ચેમ્પિયનશિપ ફાઈનલના ચોથા દિવસે ઓસ્ટ્રેલિયાએ 270 રન બનાવીને પોતાનો દાવ ડિકલેર કર્યો હતો. આ સાથે ટીમ ઈન્ડિયાને હવે ફાઈનલ જીતવા માટે 444 રનનો ટાર્ગેટ મળ્યો છે. મેચમાં પ્રથમ બેટિંગ કરતા ઓસ્ટ્રેલિયાએ 469 રનનો સ્કોર બનાવ્યો હતો. જવાબમાં ભારત 296 રન જ બનાવી શક્યું હતું અને ઓસ્ટ્રેલિયાને 173 રનની લીડ મળી હતી.
WTC ફાઈનલ અંતર્ગત ભારતીય ટીમ લંડનના ધ ઓવલ સ્ટેડિયમમાં ચાલી રહેલી ટેસ્ટ મેચના ચોથા દિવસે ઓસ્ટ્રેલિયા સામે જીતવા માટે 444 રનનો પીછો કરવા મેદાને પડી હતી.
ઓસ્ટ્રેલિયાએ ટી બ્રેકના લગભગ એક કલાક પહેલા 8 વિકેટે 270 રન બનાવીને તેનો બીજો દાવ ડિકલેર કર્યો હતો. શમીએ કેપ્ટન કમિન્સને આઠમા બેટ્સમેન તરીકે આઉટ કરતાની સાથે જ ઇનિંગ્સનો અંત જાહેર કરવામાં આવ્યો હતો. આ રીતે પ્રથમ દાવમાં 173 રન સહિત ઓસ્ટ્રેલિયાએ ભારત સામે જીત માટે કુલ 444 રનનો લક્ષ્યાંક રાખ્યો છે. લંચ બાદ ઓસ્ટ્રેલિયાએ લગભગ એક કલાક સુધી બેટિંગ કરી હતી. આ દરમિયાન વિકેટકીપર એલેક્સ કેરી (અણનમ 66)એ પોતાની અડધી સદી પૂરી કરી હતી. જ્યારે મિચેલ સ્ટાર્ક (41)એ પણ મહત્વની ઈનિંગ ખેલી હતી.
ભારત તરફથી મોહમ્મદ શમીએ પહેલા સ્ટાર્કને, ત્યાર બાદ પેટ કમિન્સને આઉટ કર્યો હતો. ઓસ્ટ્રેલિયાએ બીજા દાવમાં 84.3 ઓવરમાં 8 વિકેટે 270 રન બનાવ્યા હતા. બીજા દાવમાં રવિન્દ્ર જાડેજાએ ત્રણ અને ઉમેશ અને શમીએ બે-બે જ્યારે સિરાજે એક વિકેટ લીધી હતી.
લંચ સમયે ઓસ્ટ્રેલિયાએ તેના બીજા દાવમાં 6 વિકેટે 201 રન બનાવ્યા હતા. ત્યારબાદ વિકેટકીપર એલેક્સ કેરી 41 અને મિચેલ સ્ટાર્ક 11 રન બનાવીને ક્રિઝ પર હતા. આ રીતે પ્રથમ દાવમાં 173 રન સહિત લંચ સુધી ઓસ્ટ્રેલિયાની કુલ લીડ 374 રન થઈ ગઈ હતી. આ પહેલા ઓસ્ટ્રેલિયાએ તેના શુક્રવારના સ્કોર 4 વિકેટે 123 રનથી આગળ રમવાનું શરૂ કર્યું હતું. ત્યાર બાદ લાબુશેન 41 અને કેમેરોન ગ્રીન 7 રન બનાવીને જામી ગયા હતા. આજે શનિવારે જ્યારે ચોથા દિવસની રમત શરૂ થઈ ત્યારે થોડી જ વારમાં ઉમેશ યાદવે લબુશેનને પુજારાના હાથમાં કેચ આઉટ કરાવીને ભારતને ચોથી સફળતા અપાવી હતી. આમ આજના સ્કોરમાં લબુશેન એક પણ રન ઉમેરી શક્યો ન હતો.બીજી બાજુ રવિન્દ્ર જાડેજાએ કેમેરોન ગ્રીન (25)ની ઇનિંગ્સ મોટી ઈનિંગ રમે તે પહેલા જ તેને પેવેલિયન ભેગો કરી દીધો હતો. ગ્રીન સ્વરૂપે ઝડપેલી આ જાડેજાની ત્રીજી વિકેટ હતી.
રહાણે-શાર્દુલ બન્યા તારણહાર
પહેલી ઈનિંગમાં ભારત તરફથી અજિંક્ય રહાણે 89 અને શાર્દુલ ઠાકુરે 51 રન બનાવ્યા હતા. બંને વચ્ચે 109 રનની શાનદાર ભાગીદારીના કારણે ભારતને પુનરાગમન કરવામાં મદદ મળી હતી. પરંતુ ઓસ્ટ્રેલિયા મજબૂત સ્થિતિમાં છે. તેણે પ્રથમ દાવમાં ભારતને 296 રનમાં આઉટ કર્યા બાદ 173 રનની નોંધપાત્ર લીડ મેળવી હતી જે બીજી ઈનિંગની લીડ સાથે 444 બની ગઈ હતી.