INDvAUS: રિષભ પંતે રચ્યો ઈતિહાસ, કિરમાણી-ધોની જેવા દિગ્ગજોને રાખ્યા પાછળ, જાણો વિગત

પંત ઓસ્ટ્રેલિયા સામે ટેસ્ટ સીરિઝમાં બેટિંગથી ખાસ કમાલ દર્શાવી શક્યો નથી પરંતુ વિકેટકિપિંગમાં તે ઓસ્ટ્રેલિયા સામેની ટેસ્ટ શ્રેણીમાં ભારતનો સૌથી સફળ વિકેટકિપર બની ગયો છે. પંત પાસે તેનો આ રેકોર્ડ વધારે મજબૂત કરવાનો મોકો છે. કારણકે ઓસ્ટ્રેલિયાની બીજી ઈનિંગમાં હજુ 6 વિકેટ બાકી છે અને આ મેચ બાદ વધુ બે ટેસ્ટ મેચ ભારતે રમવાની છે.

નવી દિલ્હીઃ ભારત અને ઓસ્ટ્રેલિયા વચ્ચે પર્થમાં રમાઇ રહેલી બીજી ટેસ્ટ મેચમાં ભારતના યુવા વિકેટકિપર રિષભ પંતે અત્યાર સુધીમાં કોઈ પણ ભારતીય વિકેટકિપરે ન બનાવ્યો હોય તેવો રેકોર્ડ બનાવ્યો છે. પંતે આ રેકોર્ડ બનાવીને ધોની, સૈયદ કિરમાણી જેવા દિગ્ગજ વિકેટકિપરોને પણ પાછળ રાખી દીધા છે.

પંતે એડિલેડમાં રમાયેલી પ્રથમ ટેસ્ટ મેચમાં 11 કેચ ઝડપવાનો રેકોર્ડ બનાવ્યો હતો. જે બાદ બીજી ટેસ્ટની પ્રથમ ઈનિંગમાં 3 કેચ પકડ્યા હતા. ઓસ્ટ્રેલિયાની બીજી ઈનિંગમાં પંતે શોન માર્શનો કેચ પકડતાંની સાથે જ સીરિઝમાં 15મો કેચ પકડીને રેકોર્ડ સર્જી દીધો હતો.

સૈયદ કિરમાણીએ 1979-80માં 11 કેચ અને 3 સ્ટમ્પિંગ, 2012-13માં ધોનીએ ભારતમાં 9 કેચ અને 5 સ્ટમ્પિંગ, 2014-15માં ધોનીએ ઓસ્ટ્રેલિયામાં 13 કેચ અને 1 સ્ટમ્પિંગ અને રિદ્ધિમાન સાહાએ ભારતમાં 2016-17માં 13 કેચ અને 1 સ્ટમ્પિંગ કર્યા હતા. પંત સીરિઝમાં અત્યાર સુધી 15 કેચ ઝડપી ચુક્યો છે પરંતુ એક પણ સ્ટમ્પિંગ કર્યું નથી.

ભારત-ઓસ્ટ્રેલિયા વચ્ચે રમાયેલી ટેસ્ટ સીરિઝમાં વિકેટકિપર તરીકે સૌથી વધારે કેચ પકડવાના મામલે મહેન્દ્ર સિંહ ધોની, સૈયદ કિરમાણી અને રિદ્ધીમાન સાહાને પાછળ રાખી દીધા છે. આ ત્રણેય વિકેટકિપરે ઓસ્ટ્રેલિયા સામે ટેસ્ટ સીરિઝમાં 14-14 શિકાર ઝડપ્યા હતા.