IPL: ફાઈનલમાં પહોંચ્યું સનરાઇઝર્સ હૈદરાબાદ, KKRને 13 રને હરાવ્યું
સનરાઇઝર્સ હૈદરાબાદ ટીમ વતી રિદ્ધીમાન સાહા 35, શિખર ધવન 34 અને રશિદ ખાને 34 રનનું યોગદાન આપ્યું હતું.
કોલકત્તા: આઇપીએલ સીઝન 11ની ક્વાલિફાયર-2માં સનરાઇઝર્સ હૈદરાબાદ અને કોલકત્તા નાઇટ રાઇડર્સ વચ્ચે રમાયેલી રોમાંચક મેચમાં હૈદરાબાદે કોલકત્તાને 13 રને હરાવી ફાઇનલમાં પહોંચી ગઇ છે. હવે રવિવારે ચેન્નઈ સુપર કિંગ્સ સાથે ફાઈનલ રમશે.
ટોસ હારીને પ્રથમ બેટિંગ કરવા આવેલી સનરાઇઝર્સ હૈદરાબાદની ટીમે 20 ઓવરમાં 7 વિકેટ ગુમાવી 174 રન બનાવી કોલકત્તાને જીત માટે 175 રનનો લક્ષ્યાંક આપ્યો હતો. તેના જવાબમાં કોલકત્તાએ 20 ઓવરમાં 9 વિકેટ ગુમાવી 161 રન બનાવી શકી હતી. અને 13 રનથી હારનો સામનો કરવો પડ્યો હતો.
કોલકત્તા તરફથી ક્રિસ લીને સર્વાધિક 48 રન બનાવ્યા હતા. સુનિલ નરેન 26 અને નિતિશ રાણાએ 22 રનનું યોગદાન આપ્યું હતું.
હૈદરાબાદના જીત હિરો રાશિદ ખાન સાબિત થયો હતો. રાશિદ ખાને શાનદાર બોલિંગ કરતા 4 ઓવરમાં 19 રન આપી 3 વિકેટ ઝડપી હતી. અને તેણે બેટિંગમાં પણ આક્રમક બેટિંગ કરી 10 બોલમાં 34 રન ફટકારી હૈદરાબાદનો સ્કોર 174 સુધી પહોંચાડ્યો હતો.
સનરાઇઝર્સ હૈદરાબાદ ગ્રુપ સ્ટેજમાં 14 મેચ બાદ ટોપ પર રહ્યું હતું, પરંતુ ટીમને અંતિમ ચાર મેચમાં હારનો સામનો કરવો પડ્યો હતો. તેમાં ચેન્નઈ વિરુદ્ધ ક્વાલિફાયર-1માં મળેવી હાર પણ શામેલ છે.