ઇન્ડિયન પ્રીમિયર લીગ (IPL) 2025માં પ્લેઓફ મેચોનો સમય ધીમે ધીમે નજીક આવી રહ્યો છે. ગુજરાત ટાઇટન્સ (GT), રોયલ ચેલેન્જર્સ બેંગલુરુ (RCB), પંજાબ કિંગ્સ (PBKS) અને મુંબઈ ઇન્ડિયન્સ (MI) એ પ્લેઓફમાં પ્રવેશ કર્યો છે. જ્યારે બાકીની છ ટીમો પહેલાથી જ બહાર ફેંકાઇ ગઇ છે. IPL 2025 ની ફાઇનલ 3 જૂને અમદાવાદના નરેન્દ્ર મોદી સ્ટેડિયમ ખાતે રમાશે.
જો જોવામાં આવે તો IPL 2025 કેટલીક ટીમો માટે ખરાબ સ્વપ્ન સાબિત થયું, જ્યારે કેટલાક ભારતીય ખેલાડીઓ માટે પણ આ સીઝન તેમની અપેક્ષાઓથી વિપરીત રહી. કેટલાક સ્ટાર ખેલાડીઓ તેમની મોટી કિંમતને યોગ્ય ઠેરવવામાં નિષ્ફળ ગયા અને તેમની ટીમો પ્લેઓફમાંથી પણ બહાર થઈ ગઈ. ચાલો આવા 5 ખેલાડીઓ પર એક નજર કરીએ.
ઋષભ પંત (27 કરોડ): IPL 2025માં બધાની નજર લખનઉ સુપર જાયન્ટ્સ (LSG) ના કેપ્ટન ઋષભ પંત પર હતી, પરંતુ તેની બેટિંગે ચાહકોને નિરાશ કર્યા. પંતે 13 મેચમાં 13.72ની સરેરાશથી માત્ર 151 રન બનાવ્યા છે. આ સમયગાળા દરમિયાન તેનો સ્ટ્રાઇક રેટ 107.09 રહ્યો છે, જે ખૂબ જ આશ્ચર્યજનક છે. ઋષભની કેપ્ટનશીપ પણ નબળી રહી અને સારી શરૂઆત છતાં તેની ટીમ પ્લેઓફમાં સ્થાન મેળવી શકી નહીં. ઋષભને 27 કરોડ રૂપિયાની મોટી રકમમાં લખનઉ સુપર જાયન્ટ્સ ટીમમાં સામેલ કરાયો હતો.
વેંકટેશ ઐયર (23.75 કરોડ): મિડલ ઓર્ડર બેટ્સમેન વેંકટેશ ઐયરને કોલકાતા નાઈટ રાઈડર્સ (કેકેઆર) એ 23.75 કરોડ રૂપિયાની મોટી કિંમતે ફરીથી કરારબદ્ધ કર્યો હતો. પરંતુ આ સીઝનમાં વેંકટેશ ઐયર સંપૂર્ણપણે નિષ્ફળ રહ્યો છે. વેંકટેશે 7 ઇનિંગ્સમાં 20.28 ની સરેરાશ અને 139.21 ના સ્ટ્રાઇક રેટથી 142 રન બનાવ્યા હતા.
ઈશાન કિશન (11.25 કરોડ): વિકેટકીપર-બેટ્સમેન ઈશાન કિશને સનરાઈઝર્સ હૈદરાબાદ (SRH) માટે પોતાની ડેબ્યૂ મેચમાં અણનમ 106 રન બનાવ્યા. પછી એવું લાગતું હતું કે આ સીઝન ઇશાન કિશનના નામે રહેવાની છે, પરંતુ તે સદીની ઇનિંગ પછી, તેનું ફોર્મ પાટા પરથી ઉતરી ગયું. ઇશાન વર્તમાન સીઝનમાં 12 મેચમાં માત્ર 231 રન જ બનાવી શક્યો છે. આ સમયગાળા દરમિયાન તેમનો સરેરાશ 25.66 અને સ્ટ્રાઇક રેટ 140.85 રહ્યો છે. ઈશાનને હૈદરાબાદે 11.25 કરોડમાં ખરીદ્યો હતો પરંતુ તે ટીમની અપેક્ષાઓ પર ખરો ઉતર્યો નહીં.
મોહમ્મદ શમી (10 કરોડ): સનરાઇઝર્સ હૈદરાબાદના ફાસ્ટ બોલર મોહમ્મદ શમીનું IPL 2025માં સારું પ્રદર્શન રહ્યું નથી. આગામી ઇંગ્લેન્ડ પ્રવાસને ધ્યાનમાં રાખીને ભારતીય ટીમ માટે પણ આ ચિંતાનો વિષય છે. શમીએ વર્તમાન IPL સીઝનમાં 9 મેચોમાં અત્યાર સુધી 56.16 ની સરેરાશ અને 11.23 ના નબળા ઇકોનોમી રેટથી માત્ર 6 વિકેટ લીધી છે. ખરાબ પ્રદર્શનને કારણે શમીને છેલ્લા કેટલાક મેચોમાં પ્લેઇંગ-11માંથી બહાર બેસવું પડ્યું છે. IPL 2025 મેગા ઓક્શનમાં શમીને હૈદરાબાદ ટીમે 10 કરોડ રૂપિયામાં ખરીદ્યો હતો.
રવિચંદ્રન અશ્વિન (9.75 કરોડ): અનુભવી સ્પિનર રવિચંદ્રન અશ્વિન 10 વર્ષ પછી ચેન્નઈ સુપર કિંગ્સ (CSK) માં પાછો ફર્યો. આવી સ્થિતિમાં ચેન્નઈ સુપર કિંગ્સના ચાહકોને આશા હતી કે તે IPL 2025 માં શાનદાર પ્રદર્શન કરશે, પરંતુ આ સીઝનમાં તે ફોર્મમાં ન હોય તેવું લાગતું હતું. અશ્વિન 9 મેચમાં ફક્ત 7 વિકેટ લઈ શક્યો છે. આ સમયગાળા દરમિયાન, અશ્વિનનો ઇકોનોમી રેટ 9.12 અને સરેરાશ 40.42 હતો. અશ્વિન 9.75 કરોડ રૂપિયામાં ચેન્નાઈ સુપર કિંગ્સમાં જોડાયો હતો