ઇન્ડિયન પ્રીમિયર લીગ (IPL) 2026 માં ચેન્નાઈ સુપર કિંગ્સ (CSK) ના ફેન્સ માટે આખરે રાહતના સમાચાર આવ્યા છે. સતત 3 મેચ હાર્યા બાદ, CSK એ પોતાની ચોથી મેચમાં દિલ્હી કેપિટલ્સને 23 રનથી હરાવીને પોઈન્ટ ટેબલમાં પોતાનું ખાતું ખોલાવી દીધું છે. ચેન્નાઈની આ જીતથી પોઈન્ટ ટેબલમાં મોટી ઉથલપાથલ જોવા મળી છે. આ જીત સાથે CSK હવે 9મા સ્થાને પહોંચી ગયું છે, જ્યારે કોલકાતા નાઈટ રાઈડર્સ (KKR) ટેબલમાં સૌથી નીચે ધકેલાઈ ગયું છે. બીજી તરફ, શાનદાર ફોર્મમાં ચાલી રહેલી રાજસ્થાન રોયલ્સની ટીમ 8 પોઈન્ટ સાથે ટોપ પર મજબૂત પકડ જમાવીને બેઠી છે.
CSK ની દમદાર વાપસી અને KKR ને નુકસાન
આ સિઝનની શરૂઆત ચેન્નાઈ સુપર કિંગ્સ માટે કોઈ ખરાબ સપના જેવી રહી હતી. પહેલી 3 મેચમાં એકતરફી હારનો સામનો કર્યા બાદ, ટીમ પર ઘણું દબાણ હતું. પરંતુ પોતાના હોમ ગ્રાઉન્ડ ચેપોક સ્ટેડિયમમાં તેમણે દિલ્હી કેપિટલ્સને હરાવીને શાનદાર વાપસી કરી છે. 4 મેચમાં 1 જીત અને 3 હાર સાથે તેમના 2 પોઈન્ટ છે અને નેટ રન રેટ -1.532 છે. જોકે, CSK ની આ જીતથી KKR ને મોટો ફટકો પડ્યો છે. IPL 2026 ની 18 મેચો પૂરી થયા બાદ, KKR 4 મેચમાંથી 3 હાર અને માત્ર 1 પોઈન્ટ સાથે (-1.315 ના નેટ રન રેટથી) પોઈન્ટ ટેબલમાં સૌથી નીચે એટલે કે તળિયે સરકી ગયું છે.
રાજસ્થાન રોયલ્સનો દબદબો યથાવત
પોઈન્ટ ટેબલમાં નંબર 1 ના તાજની વાત કરીએ તો, રાજસ્થાન રોયલ્સની ટીમ શાનદાર પ્રદર્શન કરી રહી છે. રાજસ્થાને અત્યાર સુધી રમેલી ચારેય મેચ જીતીને 8 પોઈન્ટ મેળવ્યા છે અને 2.055 ના જબરદસ્ત નેટ રન રેટ સાથે તેઓ પોઈન્ટ ટેબલમાં ટોચના સ્થાને બિરાજમાન છે.
પંજાબ કિંગ્સ બીજા અને RCB ત્રીજા ક્રમે
અન્ય ટીમોની સ્થિતિ જોઈએ તો, 18 મેચોના પરિણામ બાદ પંજાબ કિંગ્સ 4 મેચમાં 3 જીત અને 7 પોઈન્ટ સાથે બીજા ક્રમે છે (તેમનો રન રેટ 0.720 છે). જ્યારે ડિફેન્ડિંગ ચેમ્પિયન રોયલ ચેલેન્જર્સ બેંગ્લોર (RCB) 3 મેચમાં 2 જીત અને 1 હાર સાથે 4 પોઈન્ટ મેળવીને ત્રીજા સ્થાને છે.
આ પછી દિલ્હી કેપિટલ્સ 4 મેચમાં 4 પોઈન્ટ સાથે ચોથા ક્રમે અને લખનૌ સુપર જાયન્ટ્સ 3 મેચમાં 4 પોઈન્ટ સાથે પાંચમા સ્થાને છે. સનરાઈઝર્સ હૈદરાબાદ (6ઠ્ઠા સ્થાને), ગુજરાત ટાઇટન્સ (7મા સ્થાને) અને મુંબઈ ઇન્ડિયન્સ (8મા સ્થાને) - આ ત્રણેય ટીમો 2-2 પોઈન્ટ સાથે અનુક્રમે એકબીજાની આગળ-પાછળ છે.