MI vs CSK: વાનખેડે સ્ટેડિયમ ખાતે સંજૂ સેમસને ધમાકેદાર બેટિંગ કરી હતી. જેમાં તેણે મુંબઈ ઇન્ડિયન્સ સામે 54 બોલમાં ઐતિહાસિક અણનમ 101 રન બનાવ્યા. આ સદીથી ચેન્નઈ સુપર કિંગ્સે પ્રથમ બેટિંગ કરતા 207 થી વધુનો સ્કોર બનાવ્યો હતો. લક્ષ્યનો પીછો કરતા મુંબઈના સ્ટાર બેટ્સમેન ફ્લોપ રહ્યા અને ફક્ત બે બેટ્સમેન (સૂર્યકુમાર યાદવ અને તિલક વર્મા) બે આંકડા સુધી પહોંચ્યા અને ટીમ 104 રનમાં ઓલઆઉટ થઈ ગઈ.
ચેન્નઈ સુપર કિંગ્સ સાથે આ સંજુ સેમસનનું પહેલું વર્ષ છે અને ફ્રેન્ચાઇઝી સાથેની તેની પહેલી જ સીઝનમાં તેણે કંઈક એવું હાંસલ કર્યું જે પહેલા કોઈ CSK બેટ્સમેન હાંસલ કરી શક્યો ન હતો. સંજુ મુંબઈ ઇન્ડિયન્સ સામે સદી ફટકારનાર ચેન્નઈનો પ્રથમ બેટ્સમેન બન્યો. બંને ટીમો IPLની પહેલી સીઝનથી રમી રહી છે અને સૌથી સફળ ટીમોમાંની એક છે.
સંજૂ સેમસન એક જ IPL સીઝનમાં એકથી વધુ સદી ફટકારનાર પાંચમો બેટ્સમેન પણ બન્યો. તેણે અગાઉ 11 એપ્રિલે દિલ્હી કેપિટલ્સ સામે સદી (115) ફટકારી હતી, પરંતુ તે અણનમ રહ્યો હતો.
ગુરુવારે મુંબઈ ઇન્ડિયન્સ સામેની મેચમાં ચેન્નઈએ પણ નિયમિત અંતરે વિકેટ ગુમાવી હતી, પરંતુ સંજૂ સેમસને બીજા છેડે સારી બેટિંગ કરી હતી, રન રેટ સ્થિર રાખ્યો હતો. સંજૂએ 54 બોલમાં છ છગ્ગા અને દસ ચોગ્ગા ફટકારીને અણનમ 101 રન બનાવ્યા હતા. આ શાનદાર ઇનિંગ માટે તેને પ્લેયર ઓફ ધ મેચ જાહેર કરવામાં આવ્યો હતો.
208 રનના લક્ષ્યનો પીછો કરતા મુંબઈ ઇન્ડિયન્સની શરૂઆત ખૂબ જ ખરાબ રહી. અકીલ હુસૈને પહેલી જ ઓવરમાં ઇમ્પેક્ટ પ્લેયર તરીકે રમી રહેલા ડેનિશ મેલેવરને આઉટ કર્યો. મુકેશ ચૌધરીએ બીજી જ ઓવરમાં ક્વિન્ટન ડી કોક (0) ને આઉટ કર્યો અને ત્રીજી ઓવરમાં અકીલે નમન ધીરને શૂન્ય રને આઉટ કર્યો હતો.
11 રનમાં ત્રણ વિકેટ ગુમાવ્યા બાદ તિલક વર્મા અને સૂર્યકુમાર યાદવે ચોથી વિકેટ માટે 73 રનની ભાગીદારી કરી હતી. જો કે, આ જોડી તૂટી ગયા પછી મુંબઈ ઇન્ડિયન્સ ફક્ત 20 વધુ રન ઉમેરી શક્યા અને આખી ટીમ પડી ભાંગી હતી. ચેન્નઈ સુપર કિંગ્સે મુંબઈ ઈન્ડિયન્સને 103 રનના મોટા માર્જિનથી હરાવ્યું.