Paris Olympics 2024: પેરિસ ઓલિમ્પિકની ઓપનિંગ સેરેમનીના થોડા કલાકો પહેલા જ ફ્રાન્સની હાઈ-સ્પીડ રેલ નેટવર્ક ખોરવાઈ ગયું છે. અહેવાલો અનુસાર, આગચંપી સહિત ‘દુર્ભાવનાપૂર્ણ કૃત્યો'ના કારણે ટ્રાન્સપોર્ટ સિસ્ટમ પર અસર પડી છે. નોંધનીય છે કે ફ્રાન્સની રાજધાની પેરિસમાં આજથી (26 જુલાઈ)થી ઓલિમ્પિક ગેમ્સ શરૂ થઇ રહ્યો છે.
ફ્રાન્સની ટ્રેન ઓપરેટર કંપની SNCFએ શુક્રવારે (26 જુલાઈ) પેરિસ ઓલિમ્પિકના ઉદ્ઘાટન સમારોહ પહેલા આ સમગ્ર મામલાની જાણકારી ન્યૂઝ એજન્સી AFPને આપી હતી. ટ્રેન ઓપરેટર SNCFએ જણાવ્યું હતું કે ફ્રાન્સના હાઇ-સ્પીડ રેલ નેટવર્ક પર આગચંપી કરી હુમલો કરાયો છે. જેના કારણે સમગ્ર ટ્રાન્સપોર્ટ સિસ્ટમ પર અસર થઇ છે
કેસની તપાસ કરી રહેલા એક સૂત્રએ એએફપીને જણાવ્યું હતું કે આ દરમિયાન તોડફોડ કરવાનો પ્રયાસ કરવામાં આવ્યો હતો જે TGV. નેટવર્ક (TurboTrain à Grande Vitesse) પર એક મોટો હુમલો છે. જેના કારણે અનેક રૂટ કેન્સલ કરવા પડ્યા હતા.
રેલ ઓપરેટરે જણાવ્યું હતું કે આ હુમલાઓથી ટ્રેન લાઇનની એટલાન્ટિક, ઉત્તરીય અને પૂર્વીય લાઇનો પ્રભાવિત થઈ હતી. ઓપરેટરે વધુમાં જણાવ્યું હતું કે ટ્રેનની સુવિધાઓને નુકસાન પહોંચાડવા માટે આગચંપી કરવામાં આવી હતી. નિવેદનમાં કહેવામાં આવ્યું છે કે ટ્રેનોને અલગ-અલગ ટ્રેક પર મોકલવામાં આવી રહી છે, જ્યારે મોટી સંખ્યામાં ટ્રેનોને રદ કરવી પડી છે.SNCF એ મુસાફરોને તેમની મુસાફરી મુલતવી રાખવા અને ટ્રેન સ્ટેશનોથી દૂર રહેવા વિનંતી કરી છે.
8 લાખ રેલવે મુસાફરોને અસર થઈ હતી
ફ્રેન્ચ ન્યૂઝ આઉટલેટ BFMTV સાથે વાત કરતા SNCF ગ્રુપના પ્રમુખે કહ્યું કે 8 લાખ ટ્રેન મુસાફરોને અસર થઈ છે. તેમણે વધુમાં જણાવ્યું હતું કે ઓલિમ્પિક ગેમ્સ માટે નેટવર્ક તૈયાર હતું, પરંતુ હવે તેઓ નેટવર્કને શક્ય તેટલી વહેલી તકે રિપેર કરવા માટે સેંકડો કર્મચારીઓને એકત્રિત કરવાનું વિચારી રહ્યા છે. france24.comના અહેવાલ મુજબ, યુરોસ્ટાર (રેલવે કંપની) એ જણાવ્યું હતું કે તોડફોડની ઘટનાઓને કારણે લંડન અને પેરિસ વચ્ચેની સેવાઓ ખોરવાઈ ગઈ છે, જેના પરિણામે ઘણી ટ્રેનો રદ થઈ છે. સીન નદી પર પેરિસ ઓલિમ્પિકના ઉદ્ઘાટન સમારોહ દરમિયાન હવામાનમાં ફેરફાર જોવા મળી શકે છે. કારણ કે હવામાન વિભાગે શુક્રવારે વરસાદની આગાહી કરી છે.