Neeraj Chopra Reaction On Silver Medal: ગઇરાત્રે રમાયેલી ઓલિમ્પિક ફાઇનલમાં ભારતીય સ્ટાર નીરજ ચોપડાએ પેરિસ ઓલિમ્પિક 2024માં સિલ્વર મેડલ જીત્યો છે. નીરજ ચોપડા ભાલા ફેંક સ્પર્ધાની ફાઇનલમાં બીજા સ્થાને રહ્યો હતો, જેના કારણે તેને સિલ્વર મેડલથી સંતોષ માનવો પડ્યો હતો. આ પહેલા નીરજ ચોપડાએ ટોક્યો ઓલિમ્પિક ગેમ્સમાં ગૉલ્ડ મેડલ જીત્યો હતો. તો શું ટોક્યો ઓલિમ્પિકનો ગૉલ્ડ મેડલિસ્ટ પેરિસ ઓલિમ્પિકમાં સિલ્વર મેડલ જીતીને ખુશ નથી ? હવે મેડલ જીત્યા બાદ નીરજ ચોપડાની પ્રતિક્રિયા સામે આવી છે. નીરજે કહ્યું કે દરેક ખેલાડીનો પોતાનો દિવસ હોય છે.
પેરિસ ઓલિમ્પિકમાં પુરુષોના ભાલા ફેંકમાં સિલ્વર મેડલ જીત્યા બાદ ANI સાથે વાત કરતા નીરજ ચોપડાએ કહ્યું, "મેચ શાનદાર રહી, દરેક ખેલાડીનો પોતાનો દિવસ હોય છે, આજે અરશદનો દિવસ હતો. ટોક્યો, બૂડાપેસ્ટ, એશિયન ગેમ્સનો મારો દિવસ હતો. મેં મારું સર્વશ્રેષ્ઠ આપ્યું, પરંતુ કેટલીક બાબતો એવી છે કે જેના પર ધ્યાન આપવાની અને કામ કરવાની જરૂર છે, ભલે આજે આપણું રાષ્ટ્રગીત વગાડવામાં ના આવ્યું હોય, તો તે ભવિષ્યમાં ચોક્કસપણે ક્યાંક વગાડવામાં આવશે."
આ સિવાય નીરજ ચોપડાએ રિફોર્મ્સ વિશે પણ વાત કરી હતી. નીરજે વધુમાં કહ્યું, "જ્યારે પણ આપણે દેશ માટે મેડલ જીતીએ છીએ ત્યારે આપણે બધા ખુશ થઈએ છીએ. હવે થ્રૉમાં સુધારો કરવાનો સમય આવી ગયો છે. આપણે ઈજાઓ પર કામ કરવું પડશે. આપણે ખામીઓને સુધારીશું. અમે બેસીને ચર્ચા કરીશું. અને પ્રદર્શન સુધારીશું."
સિઝન બેસ્ટની સાથે નીરજ ચોપડાએ જીત્યો સિલ્વર
નીરજ ચોપડાએ 89.45 મીટર ભાલા ફેંકીને સિલ્વર મેડલ જીત્યો હતો. નીરજનો આ સિઝનનો સર્વશ્રેષ્ઠ સ્કૉર હતો. આ જ સ્પર્ધામાં પાકિસ્તાનના અરશદ નદીમે ગૉલ્ડ મેડલ જીત્યો હતો. અરશદે 92.97 મીટરના થ્રૉ સાથે ગૉલ્ડ કબજે કર્યો હતો. અરશદનો આ થ્રૉ પણ ઓલિમ્પિક રેકોર્ડ બની ગયો. આ સિવાય ગ્રેનાડાનો એન્ડરસન પીટર્સ સ્પર્ધામાં ત્રીજા ક્રમે રહ્યો, જેણે બ્રૉન્ઝ મેડલ જીત્યો. એન્ડરસન પીટર્સે 88.54 મીટરનો થ્રૉ કર્યો હતો.