નવી દિલ્હીઃ સર્બિયન ટેનિસ સ્ટાર નોવાક જોકોવિચ વર્ષના પ્રથમ ગ્રાન્ડ સ્લેમ ઓસ્ટ્રેલિયન ઓપનની ફાઇનલમાં પહોંચી ગયો છે. ગુરુવારે વર્લ્ડ નંબર-2 જોકોવિચે સ્વિસ દિગ્ગજ રોજર ફેડરરને 7-6,6-4,6-3થી હાર આપી હતી. આ હારથી 38 વર્ષના વર્લ્ડ નંબર-3 ફેડરરનું 21મા ગ્રાન્ડ સ્લેમ ટાઇટલ જીતવાનું સ્વપ્ન અધુરુ રહી ગયું છે.


રેકોર્ડ આઠમું ટાઇટલ જીતવા માટે ઉતરેલા 32 વર્ષના જોકોવિચે પોતાની શાનદાર રમત બતાવતા 2 કલાક 18 મિનિટમાં ફેડરરને હાર આપી હતી. હવે ફાઇનલમાં જોકોવિચનો સામનો ઓસ્ટ્રિયાના પાંચમા સીડ ડોમિનિક થીમ અને જર્મનીના સાતમા ક્રમના ખેલાડી એલેક્ઝેન્ડર જ્વેરેજ વચ્ચે રમાનારી બીજી સેમિફાઇનલના વિજેતા સાથે થશે.


આ સાથે જ ફેડરરે પોતાના હરિફ જોકોવિચ સામે મેલબોર્નમાં ચોથી વખત હાર મળી છે. આ તમામ મેચ સેમિફાઇનલ રહી છે. જોકોવિચની નજર 17મા ગ્રાન્ડસ્લેમના ટાઇટલ પર છે. 19 ગ્રાન્ડ સ્લેમ જીતી ચૂકેલા વર્લ્ડનંબર વન રાફેલ નડાલ અગાઉથી જ બહાર થઇ ચૂક્યો છે.