કોહલી બન્યો સાન્તાક્લોઝ, બાળકોને ગિફ્ટ આપી કહી આ વાત, જાણો વિગત

કોહલીએ બાળકો સાથે વાત કરી હતી અને પુછ્યું હતું કે શું ભારતીય કેપ્ટન વિરાટ કોહલીને મળવા માંગશે. બાળકોએ જ્યારે હા કહ્યું તો કોહલીએ પોતાની નકલી મૂછો અને કેપ હટાવી બાળકોને ચોંકાવી દીધા હતા.

નવી દિલ્હીઃ કટકમાં આજે ભારત-વેસ્ટ ઈન્ડિઝ વચ્ચે ત્રીજી અને નિર્ણાયક વન ડે રમાશે. જે બાદ ટીમ ઈન્ડિયા ક્રિસમસ વેકેશન માણશે. હાલના દિવસોમાં દરેક સ્થાને ક્રિસમસની તૈયારીઓ ચાલી રહી છે. ક્રિસમસ દરમિયાન બાળકોમાં જેના માટે સૌથી વધારે ઉત્સુકતા રહે છે તે સાન્તાક્લોઝની હોય છે. આવા જ કેટલાક ખાસ બાળકોની ભેટ આપવા માટે ભારતીય કેપ્ટન વિરાટ કોહલીએ સાન્તાનો વેશ ધારણ કર્યો હતો.

કોલકાતામાં વિરાટ કોહલી એક શેલ્ટર હોમમાં પહોંચ્યો હતો, જ્યાં બાળકોને ભેટ આપીને ક્રિસમસ પહેલા તેમને ખુશ કરી દીધા હતા. સ્ટાર સ્પોર્ટ્સે ટ્વિટર પર વીડિયો શેર કર્યો છે. જેમાં વિરાટ કોહલી સિક્રેટ સાન્તા બનીને શેલ્ટર હોમ પહોંચ્યો હતો. બાળકોને પુછવામાં આવ્યું હતું કે તે ક્રિસમસ પર સાન્તાક્લોઝ પાસે શું ભેટ ઇચ્છે છે. બાળકોની ઇચ્છા પ્રમાણે કોહલી ભેટ લઈને ત્યાં પહોંચે. કોહલી સાન્તાના વેશમાં ત્યાં પહોંચ્યો હતો. જેને શરુઆતમાં બાળકો ઓળખી શક્યા ન હતા.

વીડિયોના અંતમાં કોહલીએ કહ્યું હતું કે આ ક્ષણ મારા માટે ઘણી ખાસ છે. આ બાળકો આખું વર્ષ મારા માટે ચીયર કરે છે અને તેમના ચહેરા ઉપર હાસ્ય લાવીને મને ઘણો આનંદ થયો હતો. તમને બધાને ક્રિસમસ અને નવા વર્ષની શુભકામના.