‘સેક્સ વર્કર્સનું દૂષણ બહુ વકર્યું છે’, સુરત ભાજપના ક્યા ધારાસભ્યે ગૃહમંત્રીને કરી આ ફરિયાદ? જાણો વિગત

કામરેજના ધારાસભ્ય પ્રફુલ પાનશેરીયાએ સરથાણા,શ્યામધામ ચોક, યોગીચોક, કારગીલ ચોકમાં અસામાજિક તત્વો અડિંગો જમાવીને પસાર થતી મહિલાઓની છેડતી કરે છે તેવી ફરિયાદ કરતો પત્ર લખ્યો છે. તેમણે લખ્યું છે કે વરાછા, કાપોદ્રા સહિતના વિસ્તારોમાં અસામાજિક તત્વોએ હાહાકાર મચાવ્યો હોવાથી લોકો ભારે પરેશાન છે.

બીજી તરફ વરાછાના ધારાસભ્ય .કુમાર કાનાણીએ પત્ર લખીને ફરિયાદ કરી છે કે, કાપોદ્રા વિસ્તારમાં અસામાજિક તત્વોને પોલીસનો ડર જરા સરખો પણ નહીં રહેતાં જાહેરમાં મારામારી, લૂંટ, તોડફોડ, મહિલાઓની છેડતી સહિતના બનાવો વધ્યા છે. તેમણે તો આ મુદ્દે મીડિયાને ઈન્ટરવ્યૂ પણ આપ્યા છે.

આ ધારાસભ્યો પૈકી મજૂરા વિસ્તારના ધારાસભ્ય હર્ષ સંઘવીએ એવી રજૂઆત કરી છે કે, અઠવાગેટથી મજૂરા ગેટ વિસ્તારમાં છેલ્લા કેટલાક સમયથી કોલગર્લનું દૂષણ વકર્યું છે અને આ દૂષણને અટકાવવામાં આવે. હર્ષ સંઘવીએ સેક્સ વર્કરોનું પ્રમાણ વધ્યું હોવાની ફરિયાદ કરતાં આ મુદ્દો ખાસો ચર્ચાસ્પદ બન્યો છે.

રાજ્યમાં ભાજપની સરકાર હોવા છતાં ભાજપના ધારાસભ્યોએ પોલીસની કથળેલી કામગીરી સામે પત્ર લખવા પડે તે ઘણી ગંભીર બાબત છે. કોંગ્રેસના આગેવાનો આગામી દિવસોમાં આ મુદો ઉઠાવીને ભાજપ સરકારને ભિડાવે નહીં તે માટે ભાજપના ધારાસભ્યોએ પોલીસની કામગીરી સુધારવા ખાસ ટકોર કરી છે.

સુરતઃ ગુજરાતમાં ભાજપ શાસનમાં કાયદો અને વ્યવસ્થાની સ્થિતી શ્રેષ્ઠ હોવાના ભાજપના દાવા વચ્ચે સુરતના ભાજપના ત્રણ ધારાસભ્યોએ પોલીસની કથળેલી કામગીરી સામે સવાલો પેદા કરીને સનસનાટી મચાવી છે. આ ત્રણેય ધારાસભ્યે પોલીસની કામગીરી સુધારવા માટે રાજ્યના ગૃહમંત્રી પ્રદીપસિંહ જાડેજાને પત્ર લખ્યા છે.