સુરતઃ યુવા ભાજપ પ્રમુખની રેલીમાં ભાજપના ક્યા MLAને પાસ કાર્યકરે તમાચો ઠોકી દીધો ? જાણો વિગત
થોડા સમય અગાઉ ભાજપના પ્રદેશ પ્રમુખ જીતુ વાઘાણી અને મુખ્યમંત્રી વિજય રુપાણીના અભિવાદન કાર્યક્રમમાં ભાજપના રાષ્ટ્રીય પ્રમુખ અમિત શાહની હાજરીમાં ભારે ધમાલ કરાઇ હતી. તેના કારણે કાર્યક્રમ ટૂંકાવવાની ફરજ પડી હતી અને અમિત શાહે માત્ર 4 મિનિટમાં પ્રવચન ટૂંકાવી દેવું પડ્યું હતું.
યોગીચોક પાસે ડો.ઋત્વિજ પટેલની પાઘડી ખેંચીને તેમના પર કાળી શાહી ફેંકવામાં આવી હતી. જો કે ભારે વિરોધ વચ્ચે પણ પુણા રોડ ખાતે રેલી પૂરી થઈ હતી અને ઋત્વિજ પટેલે જાહેર સભા સંબોધી હતી. ભાજપનો ગઢ ગણાતા વરાછામાં પાટીદાર અનામત આંદોલનના કારણે છેલ્લા કેટલાક સમયથી ખરાબ હાલત છે.
સરથાણાથી નિકળેલી ઋત્વિજ પટેલની રેલી વરાછામાં યોગી ચોક પાસે પહોંચી ત્યારે અચાનક પાસનો કાર્યકર જિગ્નેશ વઘાસિયા ઉપર ચડી આવ્યો હતો. તેણે ભાજપના કામરેજના ધારાસભ્ય પ્રફલ્લ પાનશેરિયાને તમાચો મારી દીધો હતો. પાનશેરીયાને તમાચો પડતાં ભાજપના કાર્યકરો દોડતા થઈ ગયા હતા.
સુરત:ગુજરાત પ્રદેશ યુવા ભાજપના નવનિયુકત પ્રમુખ ડો.ઋત્વિજ પટેલના અભિવાદન માટે સરથાણાથી પુણા થઇ ગોડાદરા સુધી યોજાયેલી બાઇક રેલી દરમિયાન પાટીદાર અનામત આંદોલન સમિતી (પાસ)ના કાર્યકર જિજ્ઞેશ વઘાસિયાએ ભાજપના ધારાસભ્યને તમાચો મારી દેતાં ચકચાર મચી ગઈ હતી.
ડો. ઋત્વિજ પટેલની બાઇક રેલી દરમિયાન અચાનક પાસના કાર્યકરો દ્વારા ઇંડાનો મારો ચલાવવાનું શરૂ કરાતાં ધમાચકડી મચી ગઇ હતી. પાસના કાર્યકર દ્વારા રેલીમાં નિકળેલી બાઇકો પર શાહી, પાણીના પાઉચ, ફુલ વિગેરે ફેંકીને અરાજકતા ફેલાવવાના પ્રયાસ કરાયા હતા.
ભાજપના કાર્યકરોએ વઘાસિયાને માંડ માંડ દૂર કર્યો હતો. જિગ્નેશ ભાજપનો ખેસ પહેરીને રેલીમાં સામેલ થયો હતો. પાસના કાર્યકરોએ ઋત્વિજ પટેલની રેલીને રોકવા તમામ તાકાત લગાવી દીધી હતું. રેલીના સ્થળ પર ભાજપ દ્વારા લગાડેલા તમામ બેનરો રેલી પૂર્વે જ ફાંડી નાંખીને પાસના કાર્યકરોએ રોષ વ્યકત કર્યો હતો.