ઓનલાઈન મીટિંગ હોય અભ્યાસ ચર્ચા હોય કે મિત્રો સાથે વિડીયો કોલિંગ હોય ક્યારેક વાતચીત શરૂ કરવી મુશ્કેલ બની જાય છે કારણ કે બીજી વ્યક્તિ પાસે WhatsApp એકાઉન્ટ નથી. આ સમસ્યાને ઉકેલવા માટે WhatsApp એ ગેસ્ટ કોલિંગ સુવિધા લોન્ચ કરી છે. આનાથી મેસેજિંગ પ્લેટફોર્મ પર એકાઉન્ટ ન હોય તેવા લોકોને પણ કોલમાં જોડાવા માટે આમંત્રણ મળે છે.
આ કરવા માટે એક કોલ લિંક બનાવો અને તેને શેર કરો. મહત્વપૂર્ણ વાત એ છે કે આ કોલ્સમાં કોઈ ફી કે સમય મર્યાદા નથી અને તે એન્ડ-ટુ-એન્ડ એન્ક્રિપ્શન પણ ઓફર કરે છે. તો, ચાલો જોઈએ કે આ સુવિધા કેવી રીતે કાર્ય કરે છે અને તેનો ઉપયોગ કરવા માટે તમારે શું કરવાની જરૂર છે.
ગેસ્ટ કોલિંગ ફીચર કેવી રીતે કામ કરે છે?
ગેસ્ટ કોલિંગમાં ફક્ત WhatsApp એકાઉન્ટ ધરાવતા વપરાશકર્તા પાસે જ કોલ શરૂ કરવાનો અને લિંક બનાવવાનો અધિકાર છે. લિંક મળ્યા બાદ ગેસ્ટ તેને તેમના બ્રાઉઝરમાં ખોલી શકે છે અને તેમનું નામ દાખલ કરી શકે છે, પરંતુ તેઓ સીધા કોલમાં જોડાઈ શકશે નહીં. તેઓએ પહેલા વેઇટિંગ રૂમમાં રાહ જોવી પડશે, જ્યાં તેમને હોસ્ટ પાસેથી પરવાનગી મળ્યા પછી જ કોલમાં જોડાવાની મંજૂરી આપવામાં આવશે. હોસ્ટ કોલમાંથી ગેસ્ટને દૂર પણ કરી શકે છે.
પ્રાઈવેસી માટે આ ધ્યાન રાખવામાં આવ્યું
વોટ્સએપ મુજબ ગેસ્ટ કોલ પણ એન્ડ-ટુ-એન્ડ એન્ક્રિપ્ટેડ હશે. વોટ્સએપના ગેસ્ટ કોલિંગ ફીચર દ્વારા એક સાથે 32 લોકો ગ્રુપ કોલમાં ઉમેરી શકાય છે. ગેસ્ટ અન્ય સહભાગીઓના ફોન નંબર જોઈ શકશે નહીં. વધુમાં, તેઓ મેસેજ મોકલી શકશે નહીં અથવા કોલમાં અન્ય લોકોને ઉમેરી શકશે નહીં. ગેસ્ટ તેમના કમ્પ્યુટર સ્ક્રીન શેર કરી શકે છે, થમ્બ્સ-અપ અથવા હાર્ટ જેવા ઇમોજી સાથે પ્રતિક્રિયા આપી શકે છે અને વાતચીત દરમિયાન તેમના વિચારો વ્યક્ત કરવા માટે Raise Hand ફીચરનો ઉપયોગ કરી શકે છે.
ગેસ્ટ કોલિંગ ફીચરનો ઉપયોગ કરવા માટે તમારે શું કરવાની જરૂર છે?
આ ફીચરનો ઉપયોગ કરવા માટે WhatsApp ખોલો અને Calls ટેબ પર જાઓ અને ટોચ પર + આઇકોન પર ટેપ કરો. "New Call Link" પસંદ કરો અને "વોઇસ અથવા વિડીયો કોલ" પસંદ કરો. જો જરૂરી હોય તો તમે લોકોને ઉમેરતા પહેલા પરવાનગી વિકલ્પને ચાલુ કરી શકો છો. પછી, લિંકને કોપી કરો અને તેને વોટ્સએપ અથવા અન્ય એપ દ્વારા શેર કરો. ગેસ્ટ તેમના મોબાઇલ અથવા કમ્પ્યુટર બ્રાઉઝરમાંથી લિંક ખોલીને જોડાઈ શકે છે.