Whatsapp New AI Feature: મેટા તેના તમામ સોશિયલ મીડિયા પ્લેટફોર્મને AI સાથે સજ્જ કરી રહ્યું છે, જેમાં Instagram, Facebook અને WhatsAppનો સમાવેશ થાય છે. આ કેટેગરીમાં મેટા વૉટ્સએપમાં એક નવા અપડેટ પર કામ કરી રહ્યું છે, જેમાં AI યૂઝર્સને મોકલવામાં આવેલા ફોટાનો જવાબ આપશે. આ સિવાય જો અપડેટ સફળ થશે તો AI ફોટો એડિટ પણ કરશે. WABetainfo અનુસાર, તે WhatsApp બીટા વર્ઝન 2.24.14.20માં જોવામાં આવ્યું હતું, તે પણ ટૂંક સમયમાં સ્ટેબલ બિલ્ડમાં સામેલ થવાની આશા છે.
કેવી રીતે કામ કરશે નવું ફિચર ? WABetainfo ના અહેવાલો અનુસાર, WhatsApp એક નવા ચેટ બટનનું પરીક્ષણ કરી રહ્યું છે. આ બટનનો ઉપયોગ કરીને યૂઝર્સ તેમના ફોટા સીધા Meta AI સાથે શેર કરી શકશે. એટલું જ નહીં, તમે ચેટબોટથી કોઈપણ વસ્તુ વિશે માહિતી મેળવી શકો છો. આ ઉપરાંત ટેક્સ્ટ અથવા પ્રૉમ્પ્ટની મદદથી તમે ચેટબોટને ફોટામાં ફેરફાર કરવા માટે પણ કહી શકશો.
WABetainfo દ્વારા શેર કરાયેલા સ્ક્રીનશૉટ અનુસાર, યૂઝર્સને તેમના ફોટા પર સંપૂર્ણ નિયંત્રણ હશે. આ સિવાય તે જ્યારે ઈચ્છે ત્યારે તેને ડિલીટ પણ કરી શકે છે.
ઓપ્શનલ હશે નવી સર્વિસ - વૉટ્સએપ પર જે નવી સર્વિસ શરૂ કરવામાં આવી રહી છે તે વૈકલ્પિક હશે. તેનો ઉપયોગ કરતા પહેલા યૂઝરે તેને સ્વીકારવું પડશે. WABetainfo એ પહેલાથી જ WhatsAppના નવા અપડેટ વિશે માહિતી આપી છે, જેમાં કહેવામાં આવ્યું છે કે WhatsApp એક એવા ફિચર પર કામ કરી રહ્યું છે જે યૂઝર્સને Meta AI સાથે પોતાનો ફોટો શેર કરીને પોતાની AI જનરેટ કરેલી તસવીર મેળવી શકશે.
તમારું પોતાનું AI જનરેટેડ ચિત્ર મેળવવા માટે તમારે પહેલા AI ચેટબોટમાં પ્રૉમ્પ્ટ 'ઇમેજિન મી' લખવું પડશે. ત્યારપછી ફોટોનો એક સેટ મોકલવાનો રહેશે, ત્યારબાદ AI તે ફોટોનું વિશ્લેષણ કરશે અને ખાતરી કરશે કે બનાવેલ ચિત્ર યૂઝર સાથે મેળ ખાય છે કે નહીં.