નવી દિલ્હીઃ ટેક જાયન્ટ Microsoft આ મહિને પોતાની Windows ઓપરેટિંગ સિસ્ટમનુ 'નેક્સ્ટ જનરેશન' વર્ઝન લૉન્ચ કરવા જઇ રહી છે. કંપનીએ જાહેરાત કરી છે કે તે 24 જૂને સાંજે 8.30 વાગે એક વર્ચ્યૂઅલ ઇવેન્ટનુ આયોજન કરશે. આ ઇવેન્ટમાં Microsoftના સીઇઓ સત્ય નડેલા અને ચીફ પ્રૉડક્ટ ઓફિસર પાનોસ પણ હાજર રહેશે. તાજેતરમાં જ થયેલી Microsoft બિલ્ડ ડેવલપર કૉન્ફરન્સ 2021 દરમિયાન કંપનીએ એ વાતના સંકેત આપ્યા હતા કે તે બહુ જલ્દી પોતાની Windows ઓપરેટિંગ સિસ્ટમના નેક્સ્ટ જનરેશન વર્ઝનને લૉન્ચ કરવા જઇ રહી છે. હવે તે 24 જૂને યોજાનારી ઇવેન્ટમાં આ નવા વર્ઝનને દુનિયાની સામે રિલીઝ કરવા જઇ રહી છે.
Windows Centralના રિપોર્ટ અનુસાર, Windows ઓપરેટિંગ સિસ્ટમના આ નવા વર્ઝનનુ કૉડ નેમ 'Sun Valley' રાખવામાં આવ્યુ છે. આમાં Windowsનુ નવુ એપ સ્ટૉર અને યૂઝર ઇન્ટરફેસની નવી ડિઝાઇન પણ સામેલ હશે. સાથે જ આ નવા વર્ઝનમાં કેટલાક ખાસ અપડેટ પણ જોવા મળશે.
ડેવલપર અને ક્રિએટર પર રહેશે ફૉકસ
બિલ્ડ ડેવલપર કૉન્ફરન્સ 2021 દરમિયાન Microsoft ના સીઇઓ સત્ય નડેલાએ કહ્યું હતુ કે- અમે અમારી Windows ઓપરેટિંગ સિસ્ટમમાં કેટલાક મોટા અપડેટ કરવા જઇ રહ્યાં છે. આ છેલ્લા એક દાયકાના અત્યાર સુધીના સૌથી મહત્વપૂર્ણ ફેરફારો હશે. અમે જલ્દી જ તમારી સાથે આને શેર કરીશું. અમારો ધ્યેય આના દ્વારા ડેવલપર અને ક્રિએટરને બેસ્ટ આર્થિક અવસર આપવાનો છે. હું છેલ્લા કેટલાક મહિનાઓથી ખુદ પણ આના પર કામ કરી રહ્યો છું અને Windowsના આ નેક્સ્ટ જનરેશનને લઇને ખુબ ઉત્સાહિત છું.
ઉલ્લેખનીય છે કે, છેલ્લા કેટલાક મહિનાઓથી માઇક્રોસૉફ્ટ Windows એ પોતાના નવા એપ સ્ટૉર પર કામ કરી રહ્યું છે. સાથે જ ઓપરેટિંગ સિસ્ટમના યૂઝર ઇન્ટરફેસમાં કેટલાક ખાસ અને મોટા ફેરફાર પર પણ કામ કરવામાં આવ્યુ છે. આ એપ સ્ટૉરમાં ડેવલપર્સ પણ પોતાની એપ બનાવીને નાંખી શકશે, જેમાં ક્રૉમ અને ફાયરફૉક્સની જેમ બ્રાઉઝર પણ સામેલ છે. આ ઉપરાંત યૂઝર્સને નવી ઓપરેટિંગ સિસ્ટમમાં વિન્ડોઝ 95ના આઇકૉન મળી શકે છે.