ન્યૂઝીલેન્ડના PM જેસિન્ડાના ઘરે બંધાશે પારણું, ગર્ભવતી બનનારા દુનિયાના બીજા PM

વેલિંગટનઃ ન્યૂઝીલેન્ડના પીએમ જેસિન્ડા ઓર્ડર્ન માતા બનવાના છે. તેમને જાતે જ આ વાતની જાહેરાત કરી છે. આ વર્ષે જૂનમાં તેમના ઘરે પારણું બંધાઇ શકે છે, સૌથી ખાસ વાત એ છે કે પીએમ કાર્યકાળ દરમિયાન માતા બનનારા તે દેશના પહેલા અને દુનિયાના બીજા નંબરના નેતા બનશે. જેસિન્ડાએ જાતે જ કહ્યું કે, હું મા બનવાની છું, મને આશા પણ ન હતી.

નોંધનીય છે કે, જેસિન્ડા પહેલા પાકિસ્તાનના પૂર્વ વડાપ્રધાન બેનઝીર ભુટ્ટોએ કાર્યકાળ દરમિયાન બાળકને જન્મ આપ્યો હતો. 37 વર્ષીય જેસિન્ડાએ ગયા વર્ષે ઑક્ટોબરમાં ન્યૂઝીલેન્ડના વડાપ્રધાન તરીકેનો કાર્યકાળ સંભાળ્યો હતો.

માતા બનવા સંદર્ભે જેસિન્ડાએ જણાવ્યું હતું કે, ‘મને આશા ન હતી, પરંતુ મારા માટે અને મારા પાર્ટનર માટે આ ગર્વની વાત છે. અમે બંને ખુશ છીએ. અમે પરિવાર ઈચ્છીએ છીએ, પણ મને ખબર ન હતી કે આ રીતે ખુશખબર મળશે.’

37 વર્ષીય જેસિન્ડાને સોશિયલ મીડિયા પર લોકો શુભેચ્છા આપી રહ્યા છે. જેસિન્ડા માતા બન્યા પછી છ અઠવાડિયા માટે રજા લેશે. જેસિન્ડાએ ટ્વિટ કરતાં લખ્યું છે કે, ‘2017નું વર્ષ મારા માટે ખાસ છે. હું એક PM અને એક માતા એમ બંનેની ભૂમિકા ભજવીશ. મારી ગેરહાજરીમાં નાયબ વડાપ્રધાન વિસ્ટન પીટર્સ કાર્યકાળ સંભાળશે.’