અમદાવાદઃ ટ્યૂશન શિક્ષક સાથે ક્લાસીસમાં આવતી યુવતીએ પતિ સાથે મળીને શું કર્યો ફ્રોડ? જાણો શું છે સંપૂર્ણ વિગત

અમદાવાદ: શહેરના રામોલ વિસ્તારમાં ટ્યૂશન ચલાવતા શિક્ષકને પોતાને ત્યાં ટ્યૂશનમાં આવતી યુવતીએ છેતર્યો છે. યુવતીએ પોતાના પતિ સાથે મળીને આ શિક્ષકને છેતર્યો હતો. શિક્ષકે યુવતી ટ્યૂશન ક્લાસીસમાં આવવાનું બંધ કરી દીધા પછી તપાસ કરતાં પોતે છેતરાયો હોવાનો અહેસાસ થયો હતો.

આ અંગેની વિગતો એવી છે કે, રામોલની સહજાનંદ સોસાયટીમાં રહેતા ગિરીશકુમાર ચૂનીલાલ પટેલ ગાયત્રી ક્લાસીસના નામે ટ્યૂશન ચલાવે છે. તેને ત્યાં પૂજા પાલ નામની યુવતી એકાઉન્ટ અને આંકડાશાસ્ત્રના ટ્યૂશન માટે આવતી હતી.

દરમિયાન 500-1000ની નોટો બંધ થઈ જતાં તેઓ ગત 11મી નવેમ્બરે જૂની 50 હજારની નોટો બેંકમાં જમા કરાવવા જતા હતા. ત્યારે ક્લાસીસમાં હાજર પૂજાએ પતિ રોનક અગ્રવાલ આઇસીઆઇસી બેન્કમાં લોન મેનેજર હોવાથી જૂની નોટની બદલામાં નવી નોટ પણ આપવાની વાત કરી હતી. વિધાર્થિની પૂજાની વાત પર વિશ્વાસ કરીને ગિરીશકુમારે તેને 50 હજાર રોક્ડા આપ્યા હતા.

પૂજાને રૂપિયા આપ્યા પછી થોડા દિવસ સુધી ટ્યૂશન ન આવતાં ગિરીશકુમારે શંકા જતાં પૂજાને ફોન કર્યો હતો. જોકે, આ ફોન અન્ય કોઈ વ્યક્તિએ ઉપાડ્યો હતો અને ગિરીશકુમારને બિભત્સ ગાળો ભાંડી હતી. આ પછી પૂજાના પતિ રોનકે વોટ્એસએપ કરીને છ કરોડનો ફ્રોડ થયું હોવાનું જણાવ્યું હતું. તેમજ આઇટીની ઇન્કવાયરી પત્યા પછી પૈસા આપી દેવાની ખાતરી આપી હતી.

લોકો સાથે છેતરપિંડી કરીને ફરાર થઇ ગયેલી પૂજાનાં માતા-પિતાએ સમાચારપત્રોમાં જાહેરાત આપી હતી કે, પૂજા અમારા કહ્યામાં નથી માટે તેની સાથે કોઇએ નાણાકીય વ્યવહાર કરવો નહીં. રામોલ પોલીસે આ દંપતી સામે છેતરપિંડીની ફરિયાદ દાખલ કરીને તપાસ શરૂ કરી છે.

ગિરીશકુમારને પૈસા ન મળતાં રામોલ પોલીસ સ્ટેશનમાં 50 હજારની છેતરપિંડીની ફરિયાદ દંપતી વિરુદ્ધ દાખલ કરાવી છે. પોલીસ સૂત્રો પાસેથી મળતી માહિતી પ્રમાણે પૂજાના લગ્ન અગાઉ એક યુવક સાથે થયા હતા. જોકે, તે રોનકને પ્રેમ કરતી હોવાથી તેની સાથે ભાગી ગઈ હતી. આ પછી પૂજાના માતા-પિતાએ તેના ડિવોર્સ કરાવીને રોનક સાથે લગ્ન કરાવી દીધાં હતાં.