ભાજપે કરી પ્રદેશ ચૂંટણી સમિતીની રચના, જાણો કોનો કોનો કરાયો સમાવેશ ?

અમદાવાદઃ ગુજરાત વિધાનસભાની ચૂંટણી વહેલી આવી રહી છે તેવી અટકળો વચ્ચે ભાજપે ચૂંટણીલક્ષી તૈયારીઓ શરૂ કરી દીધી છે. આ પ્રક્રિયાના ભાગરૂપે ભારતીય જનતા પાર્ટીના પ્રદેશ પ્રમુખ જીતુભાઈ વાઘાણીએ ગુરૂવારે ભાજપ પ્રદેશ ચૂંટણી સમિતિની જાહેરાત કરી છે.

ભાજપની પ્રદેશ ચૂંટણી સમિતિમાં પાર્લામેન્ટરી બોર્ડના તમામ સભ્યોનો સમાવેશ કરાયો છે. ભાજપ પ્રદેશ પ્રમુખ જીતુભાઈ વાઘાણી ઉપરાંત મુખ્યમંત્રી વિજય રૂપાણી, નાયબ મુખ્યમંત્રી નિતિન પટેલ, ભૂતપૂર્વ મુખ્યમંત્રી આનંદીબેન પટેલ સહિત કુલ 14 આગેવાનોનો આ સમિતીમાં સમાવેશ કરાયો છે.

આ સિવાય પ્રદેશ ભાજપ મહામંત્રી ભરતસિંહ પરમાર, લોકસભાના સભ્ય રાજેશ ચુડાસમા, પ્રદેશ ભાજપ ઉપપ્રમુખ કાનાજી ઠાકોર તથા રાજ્યસભાના સભ્ય શંભુપ્રસાદ ટુંડિયાનો પણ સમાવેશ કરાયો છે. ભાજપમાં ચૂંટણીને લગતી બાબતો અંગે નિર્ણય લેવા માટે આ સમિતી સર્વસત્તાધીશ છે.

આ સમિતીમાં કેન્દ્રીય મંત્રી પરસોત્તમ રૂપાલા, ભૂતપૂર્વ પ્રદેશ પ્રમુખ આર.સી. ફળદુ, પ્રદેશ ખજાનચી સુરેન્દ્રભાઈ પટેલ, ગુજરાત સરકારના શિક્ષણ મંત્રી ભૂપેન્દ્રસિંહ ચુડાસમા, પ્રદેશ સંગઠન મહામંત્રી ભીખુભાઈ દલસાણિયા, વરિષ્ઠ આદિવાસી આગેવાન મંગુભાઈ પટેલનો પણ સમાવેશ કરાયો છે.