અમદાવાદ: નારણપુરાના વરદાન ટાવરમાં આગ લાગતાં એક જ પરિવારના 4 લોકો થયા ભડથું

અમદાવાદ: મંગળવારે વહેલી સવારે અમદાવાદના નારણપુરા વિસ્તારમાં આવેલ વરદાન ટાવરમાં કરિયાણાની દુકાનમાં આગ લાગી હતી જેમાં ચાર લોકોનાં મોત નિપજ્યાં હતાં. આગ લાગતાની સાથે આસપાસના લોકો દોડી આવ્યા હતા અને ફાયરબ્રિગ્રેડને જાણ કરી હતી. આગ લાગતા ફાયર બ્રિગેડની 6 ગાડીઓ આવી પહોંચી હતી અને આગ પર કાબૂ મેળવ્યો હતો.

આગ લાગતા સુનિલ ચૌધરી, અર્જૂન ચૌધરી, લીલા ચૌધરી અને મોહન ચૌધરીનું મોત નિપજ્યું હતું.

આગ લાગતા આસપાસના લોકો દોડી આવ્યા હતા અને બૂમાબૂમ કરી મૂકી હતી. જોકે આગે વિકરાળ સ્વરૂપ ધારણ કર્યું હતું જેના કારણે દુકાનમાં સુઈ રહેલા મારવાડી પરિવાર આગની લપેટમાં આવી ગયો હતો.

કરિયાણાની દુકાનમાં સુઈ રહ્યા હતા તે દરમિયાન દુકાનમાં શોર્ટ સર્કિટ થતાં આગ લાગી હતી તેવું જાણવા મળ્યું છે. જેમાં મૃત્યુ પામનાર એક જ પરિવારના હોવાનું પણ જાણવા મળ્યું છે.

આગમાં એક વ્યક્તિનું ઘટનાસ્થળે મોત નિપજ્યું હતું જ્યારે ત્રણ લોકોને ગંભીર ઈજા થતાં સારવાર માટે ખસેડવામાં આવ્યા હતા. જોકે આ દરમિયાન ત્રણેયનું મોત થતાં અરેરાટી ફેલાઈ ગઈ હતી.

અમદાવાદના નારણપુરા વિસ્તારમાં શાસ્ત્રીનગર પાસેના વરદાન ટાવરમાં આવેલ કરિયાણાની દુકાનમાં શોર્ટ સર્કિટને કારણે લાગેલી આગ એટલી ભયાવહ હતી કે જોતજોતામાં ચારેબાજુ ફેલાઈ ગઈ હતી. આ અંગે તુરંત જ ફાયરબ્રિગેડને જાણ કરવામાં આવી હતી.