અમદાવાદઃ પ્રેમિકા સાથે લિવ-ઇન રિલેશનમાં રહેવા યુવતી લગ્ન છોડીને ભાગી, જાણો પછી શું થયું?

અમદાવાદઃ શહેરની બે યુવતીઓ એકબીજા વગર રહી ન શકતાં ભાગી ગઈ હતી. આ અંગે પરિવારે ગુમ થવાની ફરિયાદ નોંધાવતા યુવતીઓ પોલીસ સ્ટેશનમાં હાજર થઈ હતી, પરંતુ તેમની વાત સાંભળીને પોલીસ પણ ચોંકી ઉઠી હતી. એટલું જ નહીં, પોલીસે તેમને રક્ષણ સાથે જવા દીધી હતી.

આ ઘટનાની વિગતો એવી છે કે, અમદાવાદના રામોલ વિસ્તારમા બે યુવતીઓ ઘરેથી નાસી ગઈ હતી. એક જ સમાજની યુવતીઓ સાથે ભાગી જતા પરિવાર રામોલ પોલીસ સ્ટેશન પહોંચ્યો હતો. પોલીસે યુવતીના ગુમ થવાની ફરિયાદ નોંધી યુવતીઓની શોધખોળ શરૂ કરી તો બન્ને યુવતીઓ વચ્ચે પ્રેમસંબંધ હોવાનો ખુલાસો થયો હતો.

આમાંની એક યુવતીના ડિસેમ્બરમાં લગ્ન છે. પોલીસની શોધખોળ વચ્ચે બન્ને યુવતીઓ રહસ્યમય રીતે પોલીસ સ્ટેશન પહોંચી હતી. તેમજ પોલીસ સમક્ષ લિવ-ઈન રિલેશનશીપનો કરાર રજૂ કર્યો હતો. એટલું જ નહીં આ યુવતીઓએ આક્ષેપ કર્યો હતો કે, તેનો પરિવાર માનસિક અને શારિરીક ત્રાસ આપે છે. જેથી બન્ને મિત્રો વચ્ચે પ્રેમ હોવાથી બન્ને એકબીજા સાથે રહેવા માંગે છે.

આશ્ચર્યની બાબત છે કે એક યુવતીના લગ્નની સંપૂર્ણ તૈયારીઓ થઈ ગઈ હતી, પરંતુ યુવતી પોતાની પ્રેમિકા સાથે જીવન પસાર કરવા માંગે છે. આ યુવતીના કાયદેસરના લિવ-ઈન રિલેશનની કરારની કોપી પોલીસે સ્વીકારીને યુવતીઓને એક-બીજા સાથે રહેવાની મંજૂરી આપી, પરંતુ યુવતીઓને પરિવારનો ડર છે. જેથી પોલીસે યુવતીઓને પોલીસ રક્ષણની જરૂર હોય તો આપવાની આશા વ્યકત કરી હતી.