Renault Duster Bharat NCAP rating: લગભગ ચાર વર્ષના લાંબા અંતરાલ બાદ ભારતીય બજારમાં ફરી એન્ટ્રી મારનાર રેનોની નવી 2026 ડસ્ટર (Renault Duster) સલામતીની કસોટીમાં એકદમ ખરી ઉતરી છે. તાજેતરમાં જ ભારત ન્યૂ કાર એસેસમેન્ટ પ્રોગ્રામ (BNCAP) દ્વારા કરવામાં આવેલા ક્રેશ ટેસ્ટમાં નવી ડસ્ટરને શાનદાર 5-સ્ટાર સેફ્ટી રેટિંગ મળ્યું છે. પુખ્ત વયના લોકો (એડલ્ટ ઓક્યુપન્ટ) અને બાળકોની સુરક્ષા (ચાઈલ્ડ ઓક્યુપન્ટ) એમ બંને કેટેગરીમાં આ SUV એ બેહતરીન પ્રદર્શન કરીને લોકોનો વિશ્વાસ જીતી લીધો છે. 10,49,000 રૂપિયાની શરૂઆતી કિંમત (એક્સ-શોરૂમ) સાથે આવતી આ કાર હવે સેફ્ટીના મામલે ગ્રાહકો માટે એક મજબૂત અને ભરોસાપાત્ર વિકલ્પ બની ગઈ છે.
ક્રેશ ટેસ્ટના આંકડા અને સેલ્ટોસ સાથે ટક્કર
રેનો ઇન્ડિયાના એન્જિનિયરિંગ હેડ વી. વિક્રમના જણાવ્યા અનુસાર, વાહનનું મજબૂત માળખું અને અદ્યતન સલામતી સિસ્ટમ્સ આ 5-સ્ટાર રેટિંગ પાછળનું મુખ્ય કારણ છે. 1621 કિલો વજન ધરાવતી નવી ડસ્ટરનું ક્રેશ ટેસ્ટ કરવામાં આવ્યું હતું, જેમાં તેને એડલ્ટ સેફ્ટીમાં 32 માંથી 30.49 પોઈન્ટ અને ચાઈલ્ડ સેફ્ટીમાં 49 માંથી 45 પોઈન્ટ મળ્યા છે. જોકે, આ શાનદાર સ્કોર હોવા છતાં, એડલ્ટ સેફ્ટીમાં તે હજુ કિયા સેલ્ટોસ (જેનો સ્કોર 31.70/32 હતો) થી સહેજ પાછળ છે, પરંતુ ચાઈલ્ડ સેફ્ટીમાં બંને કાર એક સમાન લેવલ પર છે.
કેવું રહ્યું અલગ-અલગ ટેસ્ટિંગમાં પ્રદર્શન?
ક્રેશ ટેસ્ટના પરિણામોને વિગતે સમજીએ તો, ફ્રન્ટલ ઓફસેટ ટેસ્ટમાં કારે ડ્રાઈવરની છાતી અને પગ માટે 'પૂરતી' સુરક્ષા દર્શાવી હતી, જ્યારે માથા અને ગરદનના ભાગે 'સારું' રેટિંગ મળ્યું હતું. સાઇડ ઇમ્પેક્ટ (બાજુથી ટક્કર) ટેસ્ટમાં તો ડસ્ટરે 16 માંથી પૂરા 16 માર્ક્સ મેળવીને કમાલ કરી દીધી છે. બાળકોની સુરક્ષાના મામલે પણ આ કાર ક્યાંય પાછળ નથી, તેને ચાઈલ્ડ સીટ ઇન્સ્ટોલેશનમાં 12 માંથી 12 અને ડાયનેમિક ટેસ્ટમાં 24 માંથી 24 પૂરા માર્ક્સ મળ્યા છે.
નવી ડસ્ટરમાં મળશે આ ત્રણ એન્જિન વિકલ્પો:
નવી 2026 ડસ્ટર ગ્રાહકો માટે ત્રણ દમદાર એન્જિન ઓપ્શન સાથે ઉપલબ્ધ છે:
ટર્બો TCe 160: આ એન્જિન 163 PS નો મહત્તમ પાવર અને 280 Nm નો પીક ટોર્ક જનરેટ કરે છે.
ટર્બો TCe 100: આ વિકલ્પમાં 100 PS નો પાવર અને 160 Nm નો ટોર્ક મળે છે.
સ્ટ્રોંગ હાઇબ્રિડ ઇ-ટેક 160: જેમને હાઇબ્રિડ કાર પસંદ છે, તેમના માટે 1.8-લિટર પેટ્રોલ એન્જિનની સાથે 1.4 kWh બેટરી પેકનો વિકલ્પ આપવામાં આવ્યો છે.
સેફ્ટી ફીચર્સનું લાંબુ લિસ્ટ
કંપનીએ આ કારની સુરક્ષા વ્યવસ્થામાં કોઈ કસર છોડી નથી. આ નવી ડસ્ટરમાં 6 એરબેગ્સ, ઇલેક્ટ્રોનિક સ્ટેબિલિટી કંટ્રોલ (ESC), EBD સાથે ABS, બાળકો માટે ISOFIX ચાઇલ્ડ સીટ્સ, 360-ડિગ્રી કેમેરા, રીઅર પાર્કિંગ સેન્સર, ચારેય વ્હીલ્સ પર ડિસ્ક બ્રેક્સ, ઇલેક્ટ્રિક પાર્કિંગ બ્રેક અને સૌથી ખાસ 'લેવલ 2 ADAS' જેવા હાઇ-ટેક સેફ્ટી ફીચર્સ આપવામાં આવ્યા છે.
Car loan Information:
Calculate Car Loan EMI