Budget 2023 Sensex Market: નાણામંત્રી નિર્મલા સીતારમણે બુધવારે નાણાકીય વર્ષ 2023-24નું બજેટ રજૂ કર્યું હતું. નાણામંત્રીએ આ બજેટમાં મધ્યમ વર્ગ, મહિલાઓ, વરિષ્ઠ નાગરિકો અને સ્ટાર્ટઅપ કંપનીઓને ધ્યાનમાં રાખીને અનેક જાહેરાતો કરી છે. નાણામંત્રી સીતારમણના બજેટ ભાષણથી શેરબજારને બુસ્ટર ડોઝ મળ્યો. બપોરે 12:49 કલાકે BSE સેન્સેક્સ 1076.21 પોઈન્ટ એટલે કે 1.81 ટકાના વધારા સાથે 60,626 પોઈન્ટના સ્તરે ટ્રેડ થઈ રહ્યો હતો. આ રીતે સેન્સેક્સ ફરી એકવાર 60,000ના આંકને પાર કરી ગયો છે. એ જ રીતે, NSE નિફ્ટી 250.30 પોઈન્ટ એટલે કે 1.42 ટકાના વધારા સાથે 17,912.45 પોઈન્ટના સ્તરે ટ્રેડ થઈ રહ્યો હતો.
મૂડી ખર્ચ માટે મોટા બજેટની જોગવાઈ કરવામાં આવી છે, જેના કારણે બેંકિંગ શેરોમાં તેજી જોવા મળી રહી છે. બેન્ક નિફ્ટી 1.45 ટકાના વધારા સાથે 41,245 પોઈન્ટ પર ટ્રેડ કરી રહ્યો છે.
કેપિટલ ગેઈન ટેક્સમાં કોઈ રાહત ન હોવા છતાં બજારે બજેટને આવકાર્યું છે. બજેટની જાહેરાત બાદ સેન્સેક્સમાં 1000થી વધુ પોઈન્ટનો વધારો થયો છે. જ્યારે નિફ્ટી પણ 17900ને પાર કરી ગયો છે.
રોકાણકારોએ 3 લાખ કરોડની કમાણી કરી
બજેટના દિવસે રોકાણકારોની સંપત્તિમાં રૂ. 3 લાખ કરોડનો વધારો થયો છે. આજે સવારે 11 વાગ્યે BSE લિસ્ટેડ કંપનીઓનું માર્કેટ કેપ વધીને રૂ. 2,72,59,515 કરોડ થઈ ગયું છે. જ્યારે મંગળવારે બજાર બંધ થતાં તે 2,70,23,159.98 કરોડ હતું.
સેન્સેક્સમાં વધનારા ઘટનારા સ્ટોક
સંરક્ષણ શેરોમાં વધારો
સંરક્ષણ ક્ષેત્રને બજેટમાંથી ઘણી આશાઓ છે. બજેટ રજૂ થાય તે પહેલા સંરક્ષણ ક્ષેત્રના શેરોમાં વધારો થાય છે. BDL, BEL ગાર્ડન રીચ, HALના શેર વધ્યા.
ટેક્સ વધારાને કારણે સિગારેટ ઉત્પાદકોના શેરમાં ઘટાડો થયો હતો
બજેટ બાદ સિગારેટ બનાવતી કંપનીઓના શેરમાં જોરદાર ઘટાડો જોવા મળ્યો છે. BSE પર ગોડફ્રે ફિલિપ્સ ઈન્ડિયા અને ITCના શેર 5 ટકા સુધી તૂટ્યા હતા. બજેટમાં નાણામંત્રી નિર્મલા સીતારમણે સિગારેટ પર ટેક્સ વધારવાનો પ્રસ્તાવ મૂક્યો છે. ગોડફ્રે ફિલિપ્સનો શેર 4.92 ટકાના ઘટાડા સાથે રૂ. 1828.75 પર ટ્રેડ થઈ રહ્યો હતો. તે જ સમયે, ગોલ્ડન ટોબેકોના શેરમાં 3.81 ટકાનો ઘટાડો થયો છે. ITCના શેર 0.78 ટકા સુધી તૂટ્યા હતા.
નાણાપ્રધાન નિર્મલા સીતારમણે પણ મૂડી ખર્ચ, સસ્તું હાઉસિંગ અને નાના અને મધ્યમ ઉદ્યોગો પર ધ્યાન કેન્દ્રિત કર્યું. તેમણે અત્યાર સુધીના સૌથી વધુ રેલ્વે મૂડી ખર્ચની જાહેરાત કરી, જેના કારણે રેલ્વે અને ઈન્ફ્રા શેરોમાં તેજી જોવા મળી.