'જીન્સ ના પહેર, હવે તારા લગ્ન થઇ ગયા છે...' પતિએ ટોકતા પત્નીએ કરી દીધી હત્યા

ઝારખંડના જામતાડામાંથી એક ચોંકાવનારી ઘટના સામે આવી છે. એક મહિલાએ તેના પતિની હત્યા કરી દીધી હતી.

ઝારખંડના જામતાડામાંથી એક ચોંકાવનારી ઘટના સામે આવી છે. એક મહિલાએ તેના પતિની હત્યા કરી દીધી હતી. આ પાછળનું કારણ એ છે કે પતિએ તેની પત્નીને જીન્સ પહેરવાની મનાઈ કરી હતી. આનાથી ગુસ્સે થઈને પત્નીએ પતિને ઢોર માર માર્યો હતો.

ઘટના જામતાડા પોલીસ સ્ટેશન વિસ્તારના જોડભીટા ગામની છે. ગામની રહેવાસી આંદોલન ટુડુના લગ્ન બે મહિના પહેલા પુષ્પા હેબ્રમ સાથે થયા હતા. મંગળવારે રાત્રે પુષ્પા હેબ્રમ જીન્સ પહેરીને મેળો જોવા ગોપાલપુર ગામે ગઈ હતી. જ્યારે તે પાછી આવી ત્યારે તેના પતિએ વાંધો ઉઠાવ્યો હતો અને કહ્યું હતું કે હવે તું પરિણીત છે અને જીન્સ પહેરીને મેળો જોવા ના જવું.

બસ આ કારણે તેની પત્નીએ ગુસ્સામાં આવીને તેના પતિ પર છરી વડે હુમલો કર્યો હતો જેના કારણે તે ગંભીર રીતે ઘાયલ થયો હતો. પરિવારના સભ્યો ઈજાગ્રસ્ત હાલતમાં યુવકને ધનબાદ પીએમસીએચ લઈ ગયા જ્યાં તેનું મૃત્યુ થયું હતું.

મૃતકના પિતા કર્ણેશ્વર ટુડુએ જણાવ્યું હતું કે પુત્ર અને પુત્રવધૂ વચ્ચે જીન્સ પહેરવાને લઈને ઝઘડો થયો હતો અને આ વિવાદમાં પુત્રવધૂએ તેના પુત્રને છરીના ઘા મારીને મારી નાખ્યો હતો. મહિલાએ ચાકુથી હુમલો કર્યાનું સ્વીકાર્યું હતું. આ હત્યા બાદ પોલીસે સમગ્ર મામલાની તપાસ શરૂ કરી છે.

જામતાડા પોલીસ સ્ટેશનના પ્રભારી અબ્દુલ રહેમાને જણાવ્યું હતું કે ઘટનાની જાણ કરવામાં આવી હતી પરંતુ સારવાર દરમિયાન મૃત્યુને કારણે આ ઘટનાના સંબંધમાં ધનબાદમાં એફઆઈઆર નોંધવામાં આવી છે. સમગ્ર મામલાની તપાસ કરવામાં આવી રહી છે.