Malayalam Actor ND Prasad Died: મલયાલમ ફિલ્મ ઈંડસ્ટ્રીથી એક ખરાબ સમાચાર સામે આવ્યા છે. મલયાલમ એક્ટર એનડી પ્રસાદે ફાંસી લગાવીને આત્મહત્યા કરી લીધી છે. એનડી પ્રસાદનો મૃતદેહ તેમના ઘરની બહાર ઝાડ પર લટકતી હાલતમાં મળ્યો હતો. 43 વર્ષની ઉંમરે એનડી પ્રસાદે આત્મહત્યા કરી લેતાં હડકંપ મચી ગયો છે. જો કે, હાલ આત્મહત્યાના કારણ જાણવા નથી મળ્યું. પરંતુ કેટલાક મીડિયા અહેવાલોમાં કહેવાઈ રહ્યું છે કે, એક્ટર પોતાના પરિવારના મુદ્દાઓને લઈ પરેશાન હતા.
પુત્રએ જોયો પિતાનો મૃતદેહઃ
અહેવાલો અનુસાર, 25 જૂનના રોજ સાંજે 6:30 વાગ્યાની આસપાસ એનડી પ્રસાદના (ND Prasad) પુત્રએ તેના પિતાની લાશ ઘરની બહાર ઝાડ પર લટકતી જોઈ, ત્યારબાદ તેણે પડોશીઓને તેની જાણ કરી અને પછી પોલીસને જાણ કરવામાં આવી. ઈન્ડિયન એક્સપ્રેસમાં આપવામાં આવેલી માહિતી અનુસાર, પોલીસનું માનવું છે કે, અભિનેતાએ પારિવારિક સમસ્યાઓના કારણે આ પગલું ભર્યું છે.
પત્ની અલગ રહેતા હતા એનડી પ્રસાદ:
પોલીસના જણાવ્યા અનુસાર, એનડી પ્રસાદ ઘરેલું ઝઘડાઓને કારણે માનસિક તણાવમાં હતા અને ઘરેલુ હિંસાનો પણ શિકાર બન્યા હતા. અભિનેતાની પત્ની પણ છેલ્લા કેટલાક મહિનાઓથી તેનાથી અલગ રહેતી હતી. તેમના મૃત્યુના થોડા દિવસો પહેલા તેઓ ખૂબ જ હતાશા અનુભવતા હતા. પોલીસે એ પણ માહિતી આપી હતી કે અભિનેતા પર ડ્રગ્સ રાખવાનો આરોપ પણ લાગ્યો હતો. આબકારી વિભાગે ગયા વર્ષે આ આરોપમાં તેની ધરપકડ કરી હતી, જ્યારે અભિનેતા પાસેથી 2.5 ગ્રામ હશીશ તેલ, 15 ગ્રામ ગાંજા અને એક પિસ્તોલ પણ મળી આવી હતી.
વર્ક ફ્રન્ટની વાત કરીએ તો, એનડી પ્રસાદે 'ઇબા' અને 'કરમાણી' જેવી ફિલ્મોમાં કામ કર્યું હતું. વર્ષ 2016માં રિલીઝ થયેલી ફિલ્મ 'એક્શન હીરો બીજુ'માં એનડી પ્રસાદે વિલનનું પાત્ર ભજવ્યું હતું, જેની ખૂબ જ ચર્ચા થઈ હતી.