રૂપાણી સરકાર માત્ર 1000 રૂપિયામાં ટેબ્લેટ આપશે, જાણો કોણ લઈ શકશે આ ટેબ્લેટ?

આ ટેબ્લેટની બજાર કિંમત રૂપિયા 8000 જેટલી અંદાજાય છે. સરકાર એક સાથે સાડા ત્રણ લાખ ટેબ્લેટ ખરીદી રહી હોવાથી વેરા સાથે તેની પડતર કિંમત રૂપિયા 5600 જેટલી થશે. ટેબ્લેટ પર એક વર્ષની વોરંટી મળશે. આ પ્રોજેક્ટ યુવા વર્ગને આકર્ષવા હોવાથી વિતરણ પૂર્વેની તડામાર તૈયારી ચાલી રહી છે.

ગાંધીનગરઃ રાજ્ય સરકાર દ્વારા બજેટમાં કરાયેલી જાહેરાત પ્રમાણે ધોરણ 12 પછી આગળનો અભ્યાસ કરનારા તમામ વિદ્યાર્થી ભાઈ-બહેનોને ટેબ્લેટ આપવાની યોજનાનો અમલ કરવાની કાર્યવાહી હાથ ધરવામાં આવી છે. આ યોજના હેઠળ ધોરણ 12 પછી આગળ ભણતા તમામ વિદ્યાર્થીઓને માત્ર 1000 રૂપિયામાં ટેબ્લેટ મળશે.

સરકારી સૂત્રોના જણાવ્યા મુજબ ધોરણ 12 પાસ કર્યા પછી બી.એ., બી.કોમ., બી.એસ.સી., બી.બી.એ., એન્જીનીયરીંગ, મેડીકલ સહિત કોઈ પણ ક્ષેત્રમાં આગળના અભ્યાસક્રમ માટે એડમીશન લેનાર વિદ્યાર્થીઓને સ્ટાન્ડર્ડ કંપનીના ટેબ્લેટ માત્ર રૂપિયા 1000માં આપવામાં આવશે.

ગુજરાત સરકારનાં સૂત્રોએ આપેલી માહિતી પ્રમાણે જુલાઈના પ્રારંભે મુખ્યમંત્રી વિજય રૂપાણીની હાજરીમાં ભવ્ય સમારંભ યોજી ટેબ્લેટ વિતરણનો પ્રારંભ કરવામાં આવશે. વિદ્યાર્થીઓને ટેબ્લેટ માટે સરકારે રૂપિયા 200 કરોડની જોગવાઈ કરી છે. આ યોજના હેઠળ લગભગ સાડા ત્રણ લાખ વિદ્યાર્થીઓને રાહત દરે ટેબ્લેટ મળશે.