પાટણમાં નીતિન પટેલનો વિરોધ કરી રહેલા પાટીદારો પર પોલીસે વરસાવ્યા દંડા, જુઓ તસવીરો

યુનિવર્સિટીનો કાર્યક્રમ શાંતિપૂર્વક રહ્યા બાદ બસ સ્ટેન્ડ ખાતે કાર્યક્રમ શરૂ થતાં જ જય સરદારના નારા પાટીદારોએ લગાવતાં પોલીસ હરકતમાં આવી હતી. પાટીદારોને પકડી પકડીને દંડાવાળી કરીને વાનમાં બેસાડી દીધા હતા.

પાટણ: ગઈ કાલે પાટણમાં નાયબ મુખ્યમંત્રી નીતિન પટેલનો પાટીદારો દ્વારા વિરોધ કરવામાં આવ્યો હતો. મહિલાઓએ થાળીઓ વગાડીને નીતિન પટેલનો વિરોધ કર્યો હતો. ત્યારે વિરોધ કરી રહેલા પાટીદારો પર પોલીસે લાઠીચાર્જ કર્યો હતો. આ લાઠીચાર્જમાં ત્રણ પાટીદારોને ઇજા પહોંચી હતી. નીતિન પટેલ યુનિવર્સીટી ખાતે ટેબલેટ વિતરણ અને એસટી ડેપોના ખાતમુહૂર્તના પ્રસંગે હાજરી આપવા આવ્યા હતા.

આ લાઠીચાર્જમાં ત્રણ યુવાનોને ઇજા થતાં ગોલાપુર પોલીસ સ્ટેશને લઇ જવાયા બાદ જનતા હોસ્પિટલમાં પાટીદારોએ ખસેડ્યા હતા. પાટીદારો દ્વારા સંખારી ત્રણ રસ્તે ચક્કાજામ કર્યો હતો. જોકે પોલીસે તરત જ દોડી આવી તેને નિષ્ફળ બનાવ્યો હતો.

કોંગ્રેસ અને પાસના 17 પાટીદારો અને અન્ય 30 થી 35 મળી કુલ 50 માણસોના ટોળા સામે એ ડીવીઝન પોલીસ મથકે ગુનો દાખલ કરવા કાર્યવાહી હાથ ધરી હોવાનું એ ડીવીઝન પીએસઆઇ બી.એમ.દેસાઇએ જણાવ્યું હતું.