ઈસ્કોન પ્લેટિનિયમમા રહેતા 1150 લોકો કન્ટેઈન્મેન્ટ ઝોનમાં છે. બીજી તરફ વિવિધ સોસાયટીઓમાં વધી રહેલા કોરોનાના સંક્રમણને લઈને પ્રશાસન પણ ચિંતામાં છે. અમદાવાદ શહેરમાં કોરોના સંક્રમણ અટકાવવા માટે એએમસી દ્વારા તબક્કાવાર અનેક પગલાઓ લેવામાં આવ્યા છે. કોરોના કેસ વધતા ફરી એકવાર મહાનગરપાલિકાની ટીમ એક્શનમા આવી છે.
દેશના છ શહેરમાં કોરોનાથી સૌથી ઉંચો મૃત્યુદર અમદાવાદમાં નોંધાયો છે. અમદાવાદમાં કોરોનાથી મૃત્યુદર 4.1 ટકા પર પહોંચી ગયો છે. જ્યારે મુંબઈ અને દિલ્હીમાં અમદાવાદ કરતા મૃત્યુદર ઓછો છે. મુંબઈમાં મૃત્યુદર 3.9 ટકા અને દિલ્હીમાં મૃત્યુદર 1.6 ટકા છે.
અમદાવાદ શહેર અને જિલ્લામાં મળી અત્યાર સુધીમાં કુલ 47 હજાર 309 કેસ નોંધાયા છે. અત્યાર સુધીમાં કોરોનાથી 1968 દર્દીના મૃત્યુ નિપજ્યા છે. દેશના કુલ મૃત્યુઆંકમાં ગુજરાત ચોથા સ્થાને પહોંચી ગયું છે. દેશમાં કોરોનાના દર્દીનો સરેરાશ મૃત્યુદર 2.4 ટકા છે. જ્યારે ગુજરાતમાં મૃત્યુદર 4.2 ટકા છે.