સમગ્ર ગુજરાતના પાન-મસાલા ગુટખાના વેચાણને લઈને ગુજરાત પાન મસાલા શોપ ઓનર્સ એસોસિએશને એક મહત્વપૂર્ણ નિર્ણય લીધો છે. હવે પાન-મસાલાની દુકાનો પર ફક્ત પાર્સલ જ મળશે. પાન કે ફાંકી બનાવી આપવામાં આવશે. કારણ કે દુકાન પર જો કોઈ વ્યક્તિ પાન કે મસાલો ખાઈને જાહેર થૂંકતા પકડાશે તો થૂંકનારને દંડ ફટકારવામાં આવશે. આ ઉપરાંત દુકાનદારને પણ દંડ ફટકારવામાં આવશે. જેને લઈને આ નિર્ણય લેવામાં આવ્યો છે.
હાલ અમદાવાદ અને સુરતમાં જાહેરમાં થૂંકવા પર 500 રૂપિયાનો દંડ ફટકારવામાં આવી રહ્યો છે. તો પાનના ગલ્લા પાસે પણ જો કોઈ ગ્રાહક જાહેરમાં થૂંકશે તો દુકાનદારને જ 10,000 રૂપિયાનો દંડ ફટકારવામાં આવે છે. જેને લઈને અમદાવાદ મ્યુનિસિપલ કોર્પોરેશનની કાર્યવાહીના કારણે પાનની દુકાન માલિકોમાં રોષ જોવા મળ્યો છે.
અમદાવાદ મ્યુનિસિપલ કોર્પોરેશનની કાર્યવાહીના કારણે પાન-મસાલા અને ગુટખાનું વેચાણ કરનાર માલિકોના ધંધાને અસર પડી રહી છે અને માત્ર 20થી 25 ટકા ધંધો થઈ રહ્યો છે. જેના કારણે વેપારીઓમાં ભારે રોષ જોવા મળી રહ્યો છે. જેને પગલે ગુજરાત પાન મસાલા શોપ ઓનર્સ એસોસિએશને એક મહત્વપૂર્ણ નિર્ણય લીધો છે.