Ahmedabad rickshaw fare hike: છેલ્લા કેટલાક સમયથી CNGના ભાવમાં થઈ રહેલા સતત વધારાને કારણે આખરે રિક્ષાચાલકોને મોટી રાહત મળી છે. લાંબા સમયની માંગણી બાદ, અમદાવાદના વિવિધ રિક્ષા ચાલક યુનિયનો અને ટ્રાન્સપોર્ટ કમિશનર વચ્ચે ગાંધીનગરમાં યોજાયેલી બેઠકમાં રિક્ષાના ભાડામાં વધારો કરવાનો સત્તાવાર નિર્ણય લેવાયો છે. નવા દર મુજબ, હવે મુસાફરોએ 1.2 કિલોમીટરના મિનિમમ ભાડા પેટે 20 રૂપિયાની જગ્યાએ 25 રૂપિયા ચૂકવવા પડશે. જ્યારે ત્યારબાદ પ્રતિ કિલોમીટરનો ચાર્જ 15 રૂપિયાથી વધારીને 20 રૂપિયા કરવામાં આવ્યો છે. અંદાજે 3 વર્ષ પછી આ ભાડાવધારો મંજૂર કરવામાં આવ્યો છે.
CNG મોંઘુ થતાં રિક્ષાચાલકો હતા પરેશાન
પેટ્રોલ અને ડીઝલની જેમ જ છેલ્લા કેટલાક મહિનાઓથી CNGના ભાવ પણ આસમાને પહોંચ્યા છે. છેલ્લા બે મહિનામાં જ CNGના ભાવમાં 6 રૂપિયા જેટલો તોતિંગ વધારો ઝીંકાયો છે, જેના લીધે ભાવ 88 રૂપિયાને પાર કરી ગયા છે. છેલ્લા ત્રણ વર્ષથી રિક્ષાના ભાડામાં કોઈ વધારો ન થયો હોવાથી રિક્ષાચાલકોની મુશ્કેલીમાં ખૂબ વધારો થયો હતો.
યુનિયને જાતે જ આપી દીધી હતી ભાડું વધારવાની છૂટ
તંત્રને વારંવાર રજૂઆત કરવા છતાં કોઈ ઉકેલ ન આવતાં, આખરે કંટાળીને રિક્ષા ચાલક એકતા યુનિયને ડ્રાઈવરોને પોતાની રીતે વધારાનું ભાડું વસૂલવાની છૂટ આપી દીધી હતી. યુનિયને સરકાર સમક્ષ માંગ કરી હતી કે પ્રતિ કિલોમીટર ભાડું 20 રૂપિયા અને મિનિમમ ભાડું સીધું 50 રૂપિયા કરવામાં આવે.
આ પણ વાંચોઃ સ્કૂલ ખૂલતા જ વાલીઓ પર મોંઘવારીનો માર! અમદાવાદમાં રિક્ષા અને વાનના ભાડામાં મોટો વધારો
બેઠકમાં નીકળ્યો વચગાળાનો રસ્તો
આ મામલે તારીખ 22/06/2026 ના રોજ બપોરે 2:30 કલાકે ગાંધીનગર ખાતે ડૉ. જીવરાજ મહેતા ભવનમાં ટ્રાન્સપોર્ટ કમિશનર કચેરીએ એક મહત્વની બેઠક યોજાઈ હતી. આ બેઠકમાં ટ્રાન્સપોર્ટ કમિશનર, અમદાવાદ RTO અધિકારીઓ, રિક્ષા ચાલક વેલફેર એસોસિયેશનના પ્રમુખ રાજ શિર્કે, અમદાવાદ ઓટો ચાલક યુનિયનના પ્રમુખ વિજય મકવાણા અને સ્માર્ટ સિટી ડ્રાઇવર યુનિયનના પ્રમુખ પંકજ સોની હાજર રહ્યા હતા.
એક માંગ સ્વીકારાઈ, એક નકારી
આ બેઠકમાં સર્વસંમતિથી વચગાળાનો રસ્તો કાઢવામાં આવ્યો હતો અને યુનિયનની બે મુખ્ય માંગણીઓમાંથી એક જ માંગણી સ્વીકારવામાં આવી છે:
પ્રતિ કિલોમીટર ભાડું: 15 રૂપિયાથી વધારીને 20 રૂપિયા કરવાની મંજૂરી અપાઈ છે.
મિનિમમ ભાડું: યુનિયનની 50 રૂપિયા કરવાની માંગ સ્વીકારાઈ નથી, પરંતુ 1.2 કિમી માટેના જૂના 20 રૂપિયાના ભાડામાં 5 રૂપિયાનો વધારો કરીને તેને 25 રૂપિયા નક્કી કરાયું છે.
આ પણ વાંચોઃ પ્રજા પર મોંઘવારીનો ડબલ માર! અદાણી બાદ ગુજરાત ગેસે પણ CNGના ભાવમાં કર્યો વધારો
નવા ભાડા અમલમાં આવતાં હવે મુસાફરોને રિક્ષાની મુસાફરી માટે ખિસ્સા થોડા વધુ હળવા કરવા પડશે.