Ahmedabad: અમદાવાદ શહેરમાં દિવસેને દિવસે વાહનોની સંખ્યા વધી રહી છે. જેમ જેમ વાહનોની સંખ્યા વધી રહી છે તેમ તેમ ટ્રાફિકની સમસ્યા પણ સામે આવી રહી છે. આ ઉપરાંત વાહનચાલકો દ્વારા મોટી સંખ્યામાં ટ્રાફિકના નિયમોનું પણ ઉલ્લંઘન કરવામાં આવી રહ્યું છે. જેના કારણે અકસ્માત થવાની શક્યતાઓ પણ વધી જાય છે. હવે અમદાવાદ પોલીસ દ્વારા ટ્રાફિકના નિયમોનું ઉલ્લંઘન કરતા ચાલકો સામે કડક કાર્યવાહી કરવા માટે એક નવી પહેલ કરવામાં આવી છે.
અમદાવાદ શહેર ટ્રાફિક પોલીસ દ્વારા પોલીસ કમિશનરના માર્ગદર્શન હેઠળ અને સંયૂક્ત પોલીસ કમિશનર ટ્રાફિકના સુપરવિઝન હેઠળ ભારત સરકારના નેશનલ ઈન્ફોર્મેટિક્સ સેન્ટર (NIC)ના સહયોગથી VOC ચલણ એપ્લિકેશનનો ઉપયોગ શરુ કરવામાં આવ્યો છે, જે ટ્રાફિક નિયમોના ભંગ અંગેની કાર્યવાહીને વધુ મજબૂત અને અસરકારક બનાવવામાં મદદરુપ થશે. અમદાવાદ ટ્રાફિક પોલીસ દ્વારા નવી એપ્લીકેશન લોન્ચ કરવામાં આવી છે. જેનાથી મોબાઈલ દ્વારા ગુના નોંધવા અને ટ્રાફિકના અમલીકરણની ક્ષમતા વધારવા મદદ મળશે.
અમદાવાદમાં ઈ મેમોની શરુઆત
આ ઉપરાંત અમદાવાદ શહેરમાં વધતી જતી ટાફિકની સમસ્યા અને વાહન ચાલકો દ્વારા કરવામાં આવતા ટ્રાફિક નિયમોના ભંગને રોકવા હાલ
રાજ્યમાં સૌપ્રથમ વખત મુવીંગ કેમેરા દ્વારા ટ્રાફિક નિયમનનો ભંગ કરનાર તમામની સામે કાર્યવાહી કરવામાં આવશે. જેની શરુઆત પણ કરી દેવામાં આવી છે. અમદાવાદના એસજી હાઈવે પર ટ્રાયલ બેઝ પર PCR વાનમાં ડેશકેમ લગાવવામાં આવ્યા છે. આ ડેશકેમ અંતર્ગત હાઈવે પર તે મૂવ કરતા હોય ત્યારે વીડિયો ઉપરાંત તસવીરો ખેંચી લેશે અને તે એઆઈ (Artificial Intelligence) ફિલ્ટર સાથે કનેક્ટ હોવાથી તેમાંથી કોઈ ટ્રાફિક વાયોલન્સ હશે તો તે નંબર ટ્રેક કરીને તાત્કાલિક મેમો આપશે.
વધુમાં આ પ્રકારના ડેશકેમ PCR વાન અને ઇન્ટરસેપ્ટર વાનમાં લગાવવામાં આવશે. પોલીસના જણાવ્યા અનુસાર આગામી દિવસોમાં 60 જેટલા વાહનમાં આ પ્રકારના કેમેરા લગાવવાની યોજના છે. જ્યારે આવનારા ભવિષ્યમાં તેનો ઉપયોગ પોલીસની કામગીરીમાં વધુમાં વધુ મદદરૂપ થાય તે માટે પણ કરવામાં આવશે.
અમદાવાદ પોલીસના જવાનોએ પણ ફરજીયાત હેલ્મેટ પહેરવું પડશે
તો બીજી તરફ અમદાવાદ પોલીસ પણ ટ્રાફિકના નિયમોનું પાલન કરે તે માટે અમદાવાદ પોલીસ કમિશનરે પોતાના તાબા હેઠળ આવતા પોલીસ કર્મચારીઓ અને અધિકારીઓ માટે હેલ્મેટ ફરજિયાત પહેરવા પરિપત્ર જાહેર કર્યો છે. આ પરીપત્ર અનુસાર દરેક પોલીસ અધિકારી / કર્મચારી યુનિફોર્મમાં કે સિવિલ ડ્રેસમાં હોય પોતાના ફરજના સ્થળે તેમજ અન્ય સ્થળે અવર જવર કરવા માટે હેલ્મેટ પહેરવું ફરજીયાત રહેશે. પોલીસ કમિશનર ઓફીસમાં પણ કર્મચારીઓને હેલ્મેટ વગર પ્રવેશ અપાશે નહીં. અમદાવાદમાં પોલીસ કમિશ્નરે આ અંગે જાહેરનામું બહાર પાડ્યું છે. હાઈકોર્ટની સૂચના બાદ અમદાવાદ પોલીસ કમિશ્નરએ આ નિર્ણય લીધો છે. હાઈકોર્ટમાં પ્રવેશ માટે પણ હેલ્મેટ ફરજિયાત છે.
આ પણ વાંચો...