અમદાવાદ: અમદાવાદના કાલુપુર રેલ્વે સ્ટેશન પરથી 1 કરોડ 40 લાખની કિંમતની નકલી ચલણી નોટ ઝડપાઈ છે. રાજધાની એક્સપ્રેસના મુસાફરોના ચેકિંગ દરમિયાન વિકાસ શર્મા નામના શખ્સ પર પોલીસને શંકા ગઈ હતી. જેની તપાસ કરતા તેની બેગમાંથી 2 હજારના દરની નકલી નોટ મોટી માત્રામાં મળી આવતા પોલીસ પણ ચોંકી ગઈ હતી.

વિકાસ શર્માની સઘન પૂછપરછ કરાતા આ સમગ્ર કૌભાંડનો સૂત્રધાર રાજસ્થાનનો હંસરાજ બોરાણા નામનો શખ્સ હોવાનું સામે આવ્યું છે. વિકાસ મુશ્કેલીમાં હોવાની પોલીસે ચાલ ઉભી કરતા જ હંસરાજ રાજસ્થાનના જોધપુરથી ફ્લાઈટમાં અમદાવાદ આવી પહોંચ્યો હતો. પોલીસે તેને ઝડપી આકરી પૂછપરછ કરતા તેણે જ વિકાસને નકલી નોટ છાપવા કહ્યું હોવાનું કબુલ્યું છે.

દિલ્હીના રહેવાસી વિકાસે દિલ્હીની જ એક હોટેલમાં માત્ર બે જ દિવસમાં આ નકલી નોટ તૈયાર કરી હતી. આમ, નકલી નોટ પધરાવી અસલી નોટ પડાવવાનો આરોપીઓએ કારસો રચ્યો હતો જેને પોલીસે નિષ્ફળ બનાવ્યો છે.