Gujarat Rain Update: હવામાન વિભાગની આગાહીના પગલે રાજ્યમાં અનેક જગ્યાએ વાતાવરણમાં પલટો આવ્યો છે. બપોર બાદ કેટલાક વિલ્તારોમાં વરસાદી માહોલ છવાયો છે. સૌ પ્રથમ વાત કરીએ સૌરાષ્ટ્રની તો અહીં રાજકોટના જેતપુરમાં વાતાવરણમાં પલટો આવ્યો છે. જેતપુરમાં સવારથી જ અસહ્ય ઉકળાટ જોવા મળ્યો હતો. બપોર બાદ વાતાવરણમાં પલટો આવ્યો હતો. બપોર બાદ વરસાદનું આગમન થયું છે. જેતપુર પંથકમા ધીમી ધારે વરસાદ પડી રહ્યો છે. વરસાદ શરૂ થતા લોકોને ગરમીમાં રાહત મળી છે. ધીમી ધારે જેતપુર પંથકમાં વરસાદ શરૂ થતા ખેડૂતોમાં ખુશી જોવા મળી છે.
અમરેલી જિલ્લાના ગ્રામ્ય વિસ્તારોમાં વરસાદનુ આગમન
અમરેલી જિલ્લાના ગ્રામ્ય વિસ્તારોમાં વાદળ છાયા વાતાવરણ વચ્ચે વરસાદનુ આગમન થયું છે. સવારથી અસહ્ય ઉકળાટ બાદ સાવરકુંડલા પંથકના ગ્રામ્ય વિસ્તારોમાં વરસાદ પડ્યો છે. સાવરકુંડલા શહેર અને ગ્રામ્યમા વરસાદનું આગમન થતાં ખેડૂતોમાં ખુશી છવાઈ ગઈ છે. હાથસણી, નાના ભમોદ્રા, અમૃતવેલ, ભુવા, ધાર, મોલડી, મોટા ઝિંઝુડા, ઠવી, વીરડી, નાળ સહિત આસપાસના વિસ્તારમાં વરસાદનું આગમન થયું છે. વરસાદના કારણે વાતાવરણમાં ઠંડક પ્રસરી છે. અસહ્ય ઉકળાટ બાદ ચલાલા શહેરમાં પણ વરસાદનું આગમન થયું છે.
ભાવનગર જિલ્લાના વાતાવરણમાં પલટો
જેસર તાલુકા પથકમાં મેઘરાજાની ધમાકેદાર એન્ટ્રી થઈ છે. ગ્રામ્ય વિસ્તારોમાં પણ વરસાદ શરૂ થયો છે. બપોર બાદ વરસાદી વાતાવરણ બધાતા મેઘરાજાએ એન્ટ્રી કરી છે. રાજપરા, રાણપડા, રાણીગામ, ચીરોડ સહિતનાં ગામડાઓમાં વરસાદનું આગમન થયું છે. વાવણી લાયક વરસાદ વરસવાનું શરૂ થતા ખેડૂતોમાં ખુશીનો માહોલ જોવા મળી રહ્યો છે.
સાબરકાંઠામાં શરુ થયો વરસાદ
હિંમતનગર શહેરમાં વાદળછાયા વાતાવરણ વચ્ચે વરસાદ શરુ થયો છે. હિંમતનગર શહેરના અલગ અલગ વિસ્તારમાં વરસાદ વરસ્યો છે. હિંમતનગરના પોસ્ટઓફિસ, ટાવરચોક, મોતીપુરા, સહકારીજીન વિસ્તારમાં વરસાદ પડ્યો છે. વરસાદને લઈ ગરમીમાં આંશિક રાહત મળી છે.
ડાંગ જિલ્લાના વાતાવરણમાં પલટો
ડાંગના મુખ્યમથક આહવા તાલુકામાં વરસાદ શરૂ થયો છે. આહવા સહિત તળેટી વિસ્તારમાં પણ વરસાદી ઝાપટા પડ્યા છે. વરસાદ પડતા વાતાવરણમાં ઠંડક પ્રસરી છે. એકમાત્ર ગીરી મથક સાપુતારામાં પણ ધીમીધારે વરસાદ શરૂ થયો છે.
છોટાઉદેપુરમાં તંત્રના વાંકે લોકો ત્રાહિમામ
બોડેલીના અલીપુરા વિસ્તારમાં વરસાદી પાણી ભરાયા છે. ગોપાલ ટોકીઝથી રાજખેરવા નિર્માણાધિન માર્ગ પર વરસાદી પાણી ભરાયા છે. લાંબા સમયથી નવો રોડ બનાવવા કરેલા ખોદકામમાં પાણી ભરાયા છે. આસપાસના રહીશો સહિત વાહન ચાલકો મુશ્કેલીમાં મૂકાયા છે.
ગોધરામાં સવારે 10 વાગ્યા સુધીમાં પોણા ચાર ઈંચ વરસાદ પડ્યો
રાજ્યમાં હવામાન વિભાગની આગાહી વચ્ચે કેટલાક જિલ્લામાં સવારથી જ ધોધમાર વરસાદ પડી રહ્યો છે. જેના કારણે વાતાવરણમાં ઠંડક પ્રસરી છે. પંચમહાલના ગોધરામાં સવારે 10 વાગ્યા સુધીમાં પોણા ચાર ઈંચ વરસાદ પડ્યો છે. ધોધમાર વરસાદથી કેટલાક વિસ્તારો જળબંબાકાર થયા છે. નીચાણવાળા વિસ્તારોની સોસાયટીઓમાં પાણી ભરાયા છે. ગોધરા APMCમાં શાકભાજીના થેલા વરસાદી પાણીમાં વહેતા થયા છે.