અમિત શાહે મોકલાવેલી એમ્બ્યુલન્સ ગુજરાતમાં ક્યા શહેરમાં ધૂળ ખાય છે ? ધન્વંતરી રથનો પણ ઉપયોગ નહીં...

રાજ્યમાં કોરોનાના કુલ કેસનો આંક હવે ૫,૮૧,૬૨૪ છે જ્યારે કુલ મરણાંક ૭,૩૫૫ છે. હાલમાં ૧,૪૨,૧૩૯ એક્ટિવ કેસ છે જ્યારે ૬૩૭ દર્દી વેન્ટિલેટર પર છે.

અમદાવાદ: ગુજરાતમાં કોરોનાના કહેર વચ્ચે ગાંધીનગરના સાંસદ અને કેન્દ્રીય ગૃહમંત્રી અમિત શાહે તાજેતરમાં તેમના મત વિસ્તાર અંતર્ગત આવતાં બાવળામાં એમ્બ્યુલન્સની ફાળવણી કરી હતી. જોકે તંત્રની અણઘડ નીતિના કારણે મેડિકલ ઈકવિપમેન્ટથી સજ્જ વાહનો સ્ટાફના અભાવે ધૂળ ખાય છે. કેન્દ્રીય ગૃહમંત્રી અમિત શાહના માધ્યમથી મળેલી એમ્બ્યુલન્સ પણ નથી વપરાતી અને ધનવંતરી આરોગ્ય રથ પણ બાવળામાં વણ વપરાયેલો પડી રહ્યો છે. આ ઉપરાંત બાવળા અર્બન હેલ્થ સેન્ટરમાં 2 મેડિકલ વાન ધૂળખા તી પડી છે.

આ અંગે બાવળાના અર્બન હેલ્થ ઓફિસરનું ચોંકાવનારૂ નિવેદન  આપ્યું છે. તેમણે કહ્યું એમ્બ્યુલન્સ માટે ડ્રાઇવરની નિમણૂક બાકી હતી. ધનવંતરી આરોગ્ય રથ કોને ફાળવવામાં આવ્યો છે તેની ખબર નથી. 1લી તારીખે એમ્બ્યુલન્સના ડ્રાઇવરની નિમણૂક કરવામાં આવી છે. ડ્રાઇવરની નિમણૂક થતા હવે એમ્બ્યુલન્સ કાર્યરત થશે.

રાજ્યમાં શું છે કોરોનાનું ચિત્ર

રાજ્યમાં ૨૪ એપ્રિલ બાદ પ્રથમવાર દૈનિક કેસનો આંક ૧૪ હજારથી નીચે ગયો છે. રાજ્યમાં કોરોનાના કુલ કેસનો આંક હવે ૫,૮૧,૬૨૪ છે જ્યારે કુલ મરણાંક ૭,૩૫૫ છે. હાલમાં ૧,૪૨,૧૩૯ એક્ટિવ કેસ છે જ્યારે ૬૩૭ દર્દી વેન્ટિલેટર પર છે. છેલ્લા ૨૪ કલાકમાં અત્યારસુધીના સૌથી વધુ ૧૦,૫૮૨ દર્દીએ કોરોના હરાવ્યો છે. અત્યારસુધી કુલ ૪,૨૯,૧૩૦ દર્દીઓ કોરોનાથી સાજા થઇ ચૂક્યા છે.

રાજ્યમાં 18 થી 44 વર્ષના કેટલા લોકોએ લીધી રસી

રાજ્યમાં શનિવારે 18 વર્ષથી 44 વર્ષ સુધીના વ્યક્તિના રસીકરણનો શુભારંભ થયો હતો  અને 55,235 વ્યક્તિઓને પ્રથમ ડોઝનું રસીકરણ કરાયું હતું. વેક્સિનેસન (vaccinations) કાર્યક્રમ અંતર્ગત અત્યાર સુધીમાં કુલ 98,11,863 લોકોને વેક્સિનનો પ્રથમ ડોઝ આપવામાં આવ્યો છે અને 24,92,496 લોકોને કોરોનાની રસીનો બીજો ડોઝ આપવામાં આવ્યો છે.  આમ કુલ- 1,23,04,359 લોકોને રસીકરણના ડોઝ આપવામાં આવ્યા છે.