શુક્રવારે સાંજે 5 વાગ્યે શાહીબાગ સી.પી. ઓફિસે પહોંચી આશિષ ભાટિયા પોલીસ કમિશનર એ.કે.સિંગ સાથે મળી હસ્તધૂનન કરી તેઓને વિદાય આપી પોલીસ કમિશનરનો ચાર્જ સંભાળ્યો હતો. સીઆઈડી ક્રાઈમના ડીજીપી આશિષ ભાટિયા આઈપીએસ લોબીમાં પોતાની અલગ ઓળખ ઉભી કરી છે.
આશિષ ભાટિયા ગુના અને ગુનેગારોના ડામવામાં કુશળ હોવાનું પોલીસ અધિકારીઓ માને છે. આ ઉપરાંત દેશ અને દુનિયામાં ચાલતી આતંકી ગતિવિધિઓ તેમજ સંગઠનો વિશે તેઓ સુપેરે માહિતગાર રહે છે. આશિષ ભાટિયા સીઆઈડી ક્રાઈમના ડીજીપી તરીકે મહત્વના કેસોની તપાસ કરી રહ્યા છે.
છેલ્લા કેટલાંક સમયથી સુષુપ્ત અવસ્થામાં રહેલી સીઆઈડી ક્રાઈમમાં તેઓના આગમન બાદ ધમધમાટ શરૂ થયો છે. આર્થિક ગુનાઓને રોકવા માટે તેઓએ સફળ આયોજન પણ કર્યું છે. ખાસ કરીને બિટકોઈન કેસમાં તેમણે પોતાની સૂઝબૂઝથી ટીમને માર્ગદર્શન આપીને મોટાભાગના આરોપીઓને ઝડપી લઈ મજબૂત પુરાવા એકત્ર કરાવ્યા હતા.
આશિષ ભાટિયા તેઓની વર્તણૂંક અને શિસ્તને લઈને લોકમાનસમાં સારી છબિ ધરાવે છે. પોલીસ કમિશનર એ.કે.સિંઘ બાદ દિવાળીના દિવસોમાં આશિષ ભાટિયાને પોલીસ કમિશનરનો હવાલો સોંપાતા પોલીસ અધિકારી અને કર્મચારીઓમાં ખુશીનો માહોલ જોવા મળ્યો છે.