અમદાવાદઃ ગુજરાતમાં વરસાદ લંબાતાં ફરી ઉકળાટ અને બફારાથી લોકો પરેશાન છે ત્યારે રાજ્યમાં 5 દિવસ હળવા અને મધ્યમ વરસાદની આગાહી હવામાન વિભાગ દ્વારા કરવામાં આવી છે. રાજ્યના અલ- અલગ વિસ્તારમાં વાવાઝોડું ફૂંકાવાની પણ આગાહી કરવામાં આવી છે. હવામાન વિભાગની આગાહી પ્રમાણે સૌરાષ્ટ્ર અને દક્ષિણ ગુજરાતમાં છૂટોછવાયો ભારે વરસાદ આવી શકે છે.
ગુજરાતમાં શરૂઆતમાં ધમાકેદાર વરસાદ બાદ મેઘરાજા શાંત થઈ ગયા છે. તેના કારણે લોકો ગરમીથી પરેશાન છે ત્યારે વરસાદથી તેમને રાહત મળશે.
હવામાન વિભાગ દ્વારા આગાહી કરાઈ છે કે, અરબી સમુદ્રમાં અનુકૂળ સ્થિતિ સર્જાઈ છે તેથી સૌરાષ્ટ્ર અને દક્ષિણ ગુજરાતમાં છૂટાછવાયા વરસાદની શક્યતા છે. હજુ પણ રાજ્યના અનેક વિસ્તારો એવા છે જ્યાં વરસાદ થયો નથી ત્યારે આ વિસ્તારોમાં વરસાદ પડશે તો લોકોને રાહત થશે.
સૌરાષ્ટ્રના અમરેલી, ગીર સોમનાથ, જૂનાગઢ સહિતના જિલ્લાઓમાં ભારે વરસાદ પડશે. દમણ અને દાદરાનગર હવેલીમાં પણ ભારે વરસાદની આગાહી કરવામાં આવી છે.