8th pay commission latest news: કેન્દ્ર સરકારના લાખો કર્મચારીઓ લાંબા સમયથી 8મા પગાર પંચની આતુરતાપૂર્વક રાહ જોઈ રહ્યા છે અને આ માટે સતત રજૂઆતો પણ કરી રહ્યા છે. જોકે, 8મા પગાર પંચના અમલમાં હજુ વિલંબ થઈ રહ્યો છે, પરંતુ આ દરમિયાન કર્મચારીઓ માટે એક ખૂબ જ સારા અને રાહતના સમાચાર સામે આવ્યા છે. વધતી જતી મોંઘવારી સામે થોડી રાહત આપવા માટે કેન્દ્ર સરકાર ટૂંક સમયમાં મોંઘવારી ભથ્થા (DA) માં 3% નો વધારો કરી શકે છે. જેનાથી સરકારી કર્મચારીઓના પગારમાં સારો એવો વધારો જોવા મળશે અને તેમનામાં ખુશીનો માહોલ જોવા મળી રહ્યો છે.
કર્મચારીઓને મળશે 63% મોંઘવારી ભથ્થું
નવીનતમ માહિતી અને આંકડાઓ અનુસાર, જુલાઈ 2026 થી કેન્દ્રીય કર્મચારીઓના મોંઘવારી ભથ્થા (DA) માં 3% સુધીનો વધારો થવાની પ્રબળ શક્યતા છે. લેબર બ્યુરોના હાલના ડેટા પર નજર કરીએ તો, ઔદ્યોગિક કામદારો માટેનો ફુગાવો સૂચકાંક (AICPI-IW) માર્ચ 2026 માં 149.1 હતો, જે એપ્રિલ 2026 માં વધીને 149.9 થઈ ગયો છે. આ આંકડાઓના આધારે એવો અંદાજ લગાવવામાં આવી રહ્યો છે કે કર્મચારીઓનું હાલનું 60% DA વધીને 63% થઈ શકે છે. જોકે, આ અંગેનો અંતિમ નિર્ણય મે અને જૂન 2026 ના ડેટા આવ્યા બાદ કેન્દ્રીય કેબિનેટની મંજૂરી પછી જ સત્તાવાર રીતે લેવામાં આવશે.
8મા પગાર પંચ સમક્ષ શું છે કર્મચારીઓની માંગણીઓ?
એક તરફ કર્મચારીઓ DA વધારાની રાહ જોઈ રહ્યા છે, તો બીજી તરફ 8મા પગાર પંચને લઈને પણ કર્મચારી સંગઠનોએ પોતાની માંગણીઓ પંચ સમક્ષ રજૂ કરી દીધી છે. જેમાં નીચે મુજબની મુખ્ય માંગણીઓ શામેલ છે:
ફિટમેન્ટ ફેક્ટરમાં વધારો કરવો.
લઘુત્તમ વેતન (મિનિમમ સેલરી) માં નોંધપાત્ર વધારો કરવો.
મોંઘવારી ભથ્થા (DA) ને મૂળભૂત પગાર (બેઝિક પે) માં જોડી દેવું.
પેન્શન સિસ્ટમને વધુ મજબૂત અને સુરક્ષિત બનાવવી.
પરિવારની જરૂરિયાતોને ધ્યાનમાં રાખીને, લઘુત્તમ વેતન નક્કી કરવા માટે જૂની 3-યુનિટની ફોર્મ્યુલાને બદલીને 5-યુનિટની ફોર્મ્યુલા લાગુ કરવી.
આ પણ વાંચોઃ 1 લાખના રોકાણ સામે કરોડોની કમાણી! છેલ્લા 10 વર્ષમાં સુપરહિટ સાબિત થયા આ ૫ મલ્ટિબેગર શેર
શા માટે વધારવામાં આવે છે મોંઘવારી ભથ્થું?
તમને જણાવી દઈએ કે, સરકારી કર્મચારીઓ અને પેન્શનરોને મોંઘવારી ભથ્થું (DA) ખાસ એટલા માટે આપવામાં આવે છે જેથી તેઓ વધતી જતી મોંઘવારીનો આસાનીથી સામનો કરી શકે. જ્યારે ખાવા-પીવા, રહેઠાણ, વાહનવ્યવહાર અને આરોગ્ય જેવી રોજિંદી અને આવશ્યક ચીજવસ્તુઓના ભાવ બજારમાં વધે છે, ત્યારે સરકાર આ મોંઘવારીની સીધી અસર કર્મચારીઓના ખિસ્સા પર ન પડે તે માટે સમયાંતરે તેમના મોંઘવારી ભથ્થામાં સુધારો કરે છે.