8th Pay Commission report timeline: કેન્દ્રીય કર્મચારીઓ અને પેન્શનરો 8મા પગાર પંચના અહેવાલની આતુરતાથી રાહ જોઈ રહ્યા છે. આ બધા વચ્ચે નાણા મંત્રાલયે સ્પષ્ટતા કરી દીધી છે કે પંચ પોતાનો અંતિમ અહેવાલ ક્યારે રજૂ કરશે. મંત્રાલયના જણાવ્યા અનુસાર, પગાર પંચને પોતાનો રિપોર્ટ સરકારને સોંપવા માટે 18 મહિનાનો સમય આપવામાં આવ્યો છે, જોકે આ માટે કોઈ અલગ કે વહેલી સમયમર્યાદા નક્કી કરવામાં આવી નથી.
ચાલો સમજીએ કે આ 18 મહિનાનો સમયગાળો ક્યારે પૂરો થાય છે. 8મા પગાર પંચની સત્તાવાર રીતે રચના 3 નવેમ્બર, 2025ના રોજ કરવામાં આવી હતી. આ તારીખથી 18 મહિના ગણીએ તો, કમિશનનો કાર્યકાળ મે 2027 સુધી રહેશે. એટલે કે, પંચ મે 2027 સુધીમાં પોતાનો ફાઇનલ રિપોર્ટ તૈયાર કરીને સરકારને સુપરત કરશે.
હાલમાં કમિશન શું કામ કરી રહ્યું છે?
જ્યારથી 8મા પગાર પંચની રચના થઈ છે, ત્યારથી પંચ એક્શનમાં છે. કમિશન હાલમાં કર્મચારી સંગઠનો, ટ્રેડ યુનિયનો, પેન્શનર સંસ્થાઓ અને અન્ય તમામ હિસ્સેદારો સાથે સીધી વાતચીત કરી રહ્યું છે. આ પરામર્શ પ્રક્રિયાનો મુખ્ય હેતુ એ છે કે પ્રસ્તાવોને અંતિમ સ્વરૂપ આપતા પહેલા તમામ જૂથોને તેમની ચિંતાઓ અને જરૂરિયાતો રજૂ કરવાની પૂરતી તક મળે.
આ માટે વિવિધ રાજ્યો અને કેન્દ્રશાસિત પ્રદેશોમાં સતત બેઠકો યોજાઈ રહી છે. અત્યાર સુધીમાં જયપુર, ચેન્નાઈ, પુડુચેરી અને ચંદીગઢ જેવા શહેરોમાં ખાસ બેઠકોનું આયોજન કરવામાં આવ્યું છે. આ ચર્ચાઓ અને મૂલ્યાંકનના આધારે કમિશન સરકારને પોતાનો અંતિમ રિપોર્ટ સોંપશે, જેમાં કેન્દ્રીય કર્મચારીઓ અને પેન્શનરોના પગાર, ભથ્થાં, પેન્શન અને સેવાની શરતો અંગે મહત્વની ભલામણો હશે.
આ પણ વાંચોઃ 8મું પગાર પંચ: કેન્દ્રીય કર્મચારીઓના વધેલા પગાર અંગે લોકસભામાં સરકારે આપ્યું મોટું અપડેટ
સંસદમાં નાણા મંત્રાલયનો જવાબ
તાજેતરમાં જ લોકસભામાં નાણા મંત્રાલયને આ અંગે સવાલ કરવામાં આવ્યો હતો. તેના જવાબમાં સરકારે પુનરોચ્ચાર કર્યો હતો કે 8મું પગાર પંચ તેની રચનાના 18 મહિનાની અંદર પોતાની ભલામણો રજૂ કરશે. સરકારે એ પણ પુષ્ટિ કરી છે કે પંચ દ્વારા હજુ સુધી તેનો અહેવાલ રજૂ કરવામાં આવ્યો નથી. ખાસ વાત એ છે કે, કમિશન પોતાના કામનો નિયમિત રિપોર્ટ સરકારને આપવા માટે બંધાયેલું નથી; કમિશન પોતાની કામગીરીની પ્રક્રિયાઓ જાતે નક્કી કરવા માટે સંપૂર્ણપણે સ્વતંત્ર છે.
વચગાળાના રિપોર્ટની શક્યતા
એક શક્યતા એવી પણ છે કે, જે મુદ્દાઓ પર કમિશન અંતિમ નિર્ણય લઈ લે, તેના માટે તે વચગાળાનો અહેવાલ (ઇન્ટરિમ રિપોર્ટ) રજૂ કરી શકે છે. પરંતુ, તેનો અર્થ એ બિલકુલ નથી કે અંતિમ રિપોર્ટ નિર્ધારિત તારીખ પહેલાં જ આવી જશે. હાલ પૂરતું, મે 2027 જ ભલામણો રજૂ કરવા માટેની એકમાત્ર સત્તાવાર સમયમર્યાદા છે. આ સાથે જ, આ ભલામણો ક્યારથી અમલમાં આવશે તે અંગે પણ સરકારે હજુ સુધી કોઈ તારીખ નક્કી કરી નથી.
મહત્વની વાત એ છે કે અત્યારે ફિટમેન્ટ ફેક્ટર, લઘુત્તમ બેઝિક પગાર, સુધારેલું પગાર માળખું, નવા ભથ્થાં કે પેન્શનમાં થનારા ફેરફારોને લઈને હજુ સુધી કોઈ જ અંતિમ નિર્ણય લેવાયો નથી. કમિશન હજુ પરામર્શ અને મૂલ્યાંકનના તબક્કામાં જ કામ કરી રહ્યું છે.
આ પણ વાંચોઃ 8મું પગાર પંચઃ 52,600 રૂપિયા લઘુત્તમ પગારની માંગ! જાણો હવે સરકાર આગળ શું કરશે?