નવી દિલ્હીઃ પાંચ રાજ્યોની વિધાનસભાની ચૂંટણી બાદ 137 દિવસ આજે ફરી પેટ્રોલ અને ડીઝલના ભાવમાં વધારો થયો છે. સરકારી ઓઈલ કંપનીઓએ પ્રતિ લિટરે પેટ્રોલના ભાવમાં 80 પૈસાનો વધારો કર્યો છે. જ્યારે ડીઝલમાં પ્રતિ લિટરે પણ 80 પૈસાનો વધારો કર્યો છે. અસહ્ય ઉચા ટેક્સના કારણે દેશમાં પેટ્રોલ-ડીઝલ મોંઘા હોવા મુદ્દે દેશભરમાં વ્યાપક વિરોધ બાદ કેંદ્ર સરકારે છેલ્લે ચાર નવેમ્બર 2021એ ડ્યુટી ઘટાડીને પેટ્રોલ 12 રૂપિયા અને ડીઝલ પ્રતિ લિટરે 17 રૂપિયા સસ્તુ થયુ હતુ.
જો કે યુક્રેન-રશિયા વચ્ચેના યુદ્ધને પગલે ક્રુડના ભાવ કુત્રિમ રીતે અતિ ઉંચાઈએ પહોંચ્યા હતા અને બાદમાં થોડા નીચે પણ આવ્યા છે. જો કે ઈંધણનો ભાવ સ્થિર રહ્યા તે સમય દરમિયાન ખાદ્યતેલ, લોખંડ સહિતની ધાતુ, બાંધકામ મટીરીયલ્સ, મસાલા, ઘઉં, રાંધણ ગેસ સહિત અનેક ચીજ વસ્તુઓમાં ભાવ વધારો યથાવત રહ્યો છે.
સરકારના રાજકીય વિરોધીઓએ આરોપ લગાવ્યો હતો કે મોદી સરકારે પાંચ રાજ્યોમાં ચૂંટણીને કારણે તેલ કંપનીઓને ભાવ વધારવાથી રોકી હતી. આંતરરાષ્ટ્રીય બજારમાં ક્રૂડ ઓઈલની કિંમત 112 ડોલર પ્રતિ બેરલ પર પહોંચી ગયા બાદ ઓઈલ કંપનીઓએ રવિવારે ડીઝલના મોટા ખરીદદારો માટે 25 રૂપિયા પ્રતિ લિટરનો વધારો કર્યો હતો. ઓઈલ ડીલર્સનું કહેવું છે કે છૂટક કિંમતમાં ધીમે ધીમે વધારો કરવામાં આવશે.
દિલ્હીમાં પેટ્રોલની કિંમત 96.21 રૂપિયા છે જ્યારે ડીઝલની કિંમત 87.47 રૂપિયા પ્રતિ લીટર છે. મુંબઈમાં પેટ્રોલની કિંમત 110.82 રૂપિયા અને ડીઝલની કિંમત 95.00 રૂપિયા પ્રતિ લીટર છે. કોલકાતામાં પેટ્રોલની કિંમત 105.51 રૂપિયા છે જ્યારે ડીઝલની કિંમત 90.62 રૂપિયા પ્રતિ લીટર છે. તે જ સમયે, ચેન્નાઈમાં પેટ્રોલ 102.16 રૂપિયા પ્રતિ લીટર અને ડીઝલ 92.19 રૂપિયા પ્રતિ લીટર છે.
આ રાજ્યોમાં પેટ્રોલનો ભાવ 100 રૂપિયાને પાર કરી ગયો છે
જણાવી દઈએ કે, મધ્યપ્રદેશ, રાજસ્થાન, મહારાષ્ટ્ર, આંધ્રપ્રદેશ, તેલંગાણા, કર્ણાટક, ઓડિશા, જમ્મુ-કાશ્મીર અને લદ્દાખમાં પેટ્રોલની કિંમત 100 રૂપિયા ચાલી રહી છે. મુંબઈમાં પેટ્રોલનો ભાવ સૌથી વધુ છે.
જાણો તમારા શહેરમાં કિંમત કેટલી છે
તમે SMS દ્વારા પણ પેટ્રોલ અને ડીઝલની કિંમત જાણી શકો છો. ઈન્ડિયન ઓઈલની વેબસાઈટ પર જઈને તમારે RSP અને તમારો સિટી કોડ લખવો પડશે અને તેને 9224992249 નંબર પર મોકલવો પડશે. દરેક શહેરનો કોડ અલગ-અલગ છે, જે તમને IOCLની વેબસાઇટ પરથી મળશે.
તમને જણાવી દઈએ કે પેટ્રોલ અને ડીઝલના ભાવ દરરોજ સવારે 6 વાગ્યે બદલાય છે. નવા દરો સવારે 6 વાગ્યાથી લાગુ થશે. પેટ્રોલ અને ડીઝલની કિંમતમાં એક્સાઈઝ ડ્યુટી, ડીલર કમિશન અને અન્ય વસ્તુઓ ઉમેર્યા બાદ તેની કિંમત લગભગ બમણી થઈ જાય છે.
આ માપદંડોના આધારે તેલ કંપનીઓ દરરોજ પેટ્રોલ અને ડીઝલના દર નક્કી કરવાનું કામ કરે છે. ડીલરો પેટ્રોલ પંપ ચલાવતા લોકો છે. તેઓ ટેક્સ અને પોતાનું માર્જિન ઉમેર્યા પછી ગ્રાહકોને છૂટક ભાવે પેટ્રોલ વેચે છે. આ ખર્ચ પેટ્રોલ અને ડીઝલના દરમાં પણ ઉમેરવામાં આવે છે.